CEBU, Philippines - Gisalikway sa mga sakop sa Homicide Section sa kapolisan sa dakbayan sa Lapulapu nga naghikog ang namatay nga polis nga si PO1 Arnold Lao-ay.
Si Senior Inspector Zenaido Pastorfide Jr., hepe sa Homicide Section nga nahinabi sa Banat News mas nagtuong naaksidente sa iyang armas ang maong polis samtang iyaha kining gilimpyohan sulod sa iyang lawak.
Matud pang Pastorfide sumala pa sa amahan nga padulong sa iyang duty si Lao-ay ug uwahi niya kining nakit-ang naglimpiyo sa armas ug kalit lang milanog ang buto sa armas ug dihang gisusi nagbuy-od na sa sawog nga nagkadugo ang ulo sa iyang anak.
Dugang pa ni Pastorfide wala silay nakitang timailhan diha sa crime scene nga naghikog ang maong polis sanglit wala man sila makakuha og suicide note, gibutyag usab niya nga wala pa mapaubos sa mga pagbansaybansay sa gun proficiency si Lao-ay ug posibleng di pa kini sinati paggamit sa armas nga kalibre .45. Ang mga imbestigador nagpaabot pa sa resulta sa autopsy sa patay’ng lawas ni Lao-ay aron pagtino sa hinungdan sa kamatayon niini una pa sila makapagawas og kompletong resulta sa imbestigasyon. - Romeo T. Limpangog/EIM (BANAT NEWS)