Gwen mobarug batok RH Bill

CEBU, Philippines - Lig-on ang baruganan ni Governor Gwendolyn Garcia nga bisan unsay mahitabo motamod siya sa kampanya sa simbahan pagpatunhay sa kinabuhi o pro-life ug bisan pa kun mahimong  balaod ang Reproductive Health (RH) Bill di angay pugson ang magtiayon sa pagpugong sa panganak.

Ang gobernador nga miduyog   sa Solidarity March & Mass For Life Against RH Bill, usa ka prayer rally sa miaging Sabado mipasabot nga ang pagpugong sa pagpanganak pinaagi sa mga kontraseptibo nga gitanyag sa kagamhanan usa ka pagpuo sa kinabuhi. Busa alang sa gobernador nga mas maayo sa magtiayon nga moplano sa pagpakondisyon pirme sa lawas sa asawa o inahan aron nga makasukol kini sa mga balatian nga modasmag sa panahon sa pagsabak ug makasugakod hangtod kanus-a maitos ang natural nga kinutbanan sa iyang pagpanganak.

Ang baruganan sa gobernador maoy gikampanya sa mga kaparian sa Katoliko nga ang  pagputol sa pagpanganak pinaagi sa artificial nga pamaagi sama sa kondom, pildoras ug uban pa usa ka pagpuo sa kinabuhi o anti-life busa dakong sala sa Ginoo.

Si Gobernador Garcia nga mokandidato sa pagka-senador sa election sa 2013 nagtuo nga tanang mga Katoliko dili makalimot kaniya sa pagpili ilabi na karong nasinati na nila ang hugot niyang baruganan batok sa RH Bill.

 Ang maong baruganan susama usab sa giawhag ni Talisay City Mayor Socrates Fernandez kinsa miingon nga angayan lamang nga panalipdan ug paluyohan ang kawsa sa pagpanalipod sa kinabuhi nga gikan sa Labaw’ng Makagagahum.

Ang mga anti-RH Bill mibahad nga bisan magbaha pa ang mga kontraseptibo nga ihatag nga libre sa kagamhanan ngadto sa matag magtiayon ipadayon nila ang pag-awhag sa hingtungdan nga dili kini dawaton kay makadaot kini sa ilang kalag.

Ikampanya usab nila nga ang mga sustansya sa inahan nga magsabak ug sa bata nga gisabak niini nga ihatag nga libre sa goberno, maoy pahimuslan nila pag-ayo aron nga magpabilin ang kahimsog sa panglawas sa inahan nga bisan pila pa ka bata ang maporma sa iyang taguangkan ug ipanganak dili siya maluya ug dili moyaya hangtud sa katapusang bata nga angay niyang ianak. (BANAT NEWS)