One Cebu Expo malampuson

CEBU, Philippines - Giisip nga malampuson ang One Cebu Expo 2012 nga usa sa mabulokong bahin sa ika-443 nga kasaulogan sa anibersaryo sa lalawigan sa Sugbo kansang kapin sa 100 ka mga produkto nga ginama sa Sugbo suportado sa Department of Trade and Industry (DTI).

Si DTI Provincial Director Nelia Navarro mipadayag sa iyang kahinangop kagahapon   sa maong kalampusan tungod kay kasagaran sa mga lokal nga produkto sa One Cebu Expo ubos man sa One Town, One Product (OTOP) Program nga gi-display didto sa Cebu International Convention Center (CICC) sukad sa miaging semana. Mikabat sa 450 ka exhibitors ang misalmot sa maong tinuig nga kalihokan ug ang mga Sugboanong produkto nga gipamaligya sa maong higayon naglangkob sa mga muwebles, pagkaon, duwaan, fashion accessories, houseware ug uban pang mga baligya alang sa mga lokal nga turista.

Sumala ni Navarro nga sa kaping usa ka gatos ka mga gi-display nga mga produkto nga OTOP, kapin sa 50 niini gisuportahan sa ilang Local Government Units (LGU).

Dugang pa ni Navarro nga ang expo usa sa dapit diin ang LGUs ug ubang Micro, Small and Medium Enterprises (MSMEs) makapasundyag sa ilang OTOP nga mga baligya ug uban pang produkto lakip na kadtong pang- export-quality.

Ang One Cebu Expo usa ka proyekto nga gipasiugdahan sa kagamhanan sa lalawigan sukad pa niadtong tuig 2008 nga adunay 188 ka exhibitor sa maong higayon, sa miaging tuig aduna kini 360 ka mga exhibitor, ug sa pagkakaron nahimo na kining 450 ka mga exhibitor nga buot ipasabot nga malambuon ang maong programa.

Giangkon ni Navarro nga gumikan sa kadaghang misalmot niini karong tuiga nakatampo kaayo kini og dako sa MSMEs ug LGUs sa pagpausbaw sa ilang popular nga produkto ug sa lokal nga turismo. (BANAT NEWS)