Sikyu IT Park mosikop sa manigarilyo

CEBU, Philippines - Himoong deputized agents sa Task Force Cancer of the City of Cebu (TCCC) ang mga security guard sa IT Park, sa Barangay Apas niining dakbayan sa Sugbo.

Kini maoy gibutyag sa tsirman sa TCCC nga si Dr. Lucille Mercado isip kabahin sa paghingusog nila sa ilang kampanya sa pagdili pagpataka og panigarilyo.

Gikatakdang ipatawag ang mga tagdumala sa mga balay patigayon sa IT Park aron pangayoan sa listahan sa mga ngalan sa ilang mga security guard. Sumala pa ni Mercado nga dili mahimo kung sila ra ang mobantay sa maong lugar - busa gikinahanglan nila ang kooperasyon sa mga tagdumala sa nagkadaiyang establisamento sa IT Park.

Ang masakpan nga manigarilyo makamulta og P500 o kaha moserbisyo   sa komunidad isip silot.

Hinuon nahinangop si Mercado gumikan kay ang mga building sa maong dapit mipahimutang og usa ra ka “smoking area” diin adto didto magsuyop sa sigarilyo ang nagbisyo niini.

Gituyo kini sa TCCC aron dili ma-expose sa aso sa sigarilyo ang mga tawo nga mosuroy sa maong dapit ilabi na kadtong mga tawo nga mosulod sa mga kan-anan.

Matud pa niya nga risgo kaayo sa cancer sa baga sa mga tawo nga mohanggap sa aso sa sigarilyo.        

Dugang pa ni Mercado nga dili usab sila mohunong sa pagpahigayon og surpresa nga inspeksyon sa IT Park bisan pa kun ma- deputize na puhon ang mga security guard

Samtang usa ka call center agent nga nagbase sa IT park nga si Arvin Riles mipadayag sa iyang kahinangop sa plano sa TCCC gumikan kay usa kini sa pamaagi nga mawad-an og gana sa pagpanigarilyo ang mga tawo nga nagbisyo niini. (/WC)(BANAT NEWS)