Metro Manila gilunopan

CEBU, Philippines - Gilunopan ang tibuok Metro Manila ug mga kasikbit niining mga dapit tungod sa walay puas nga pagbunok sa uwan nga mikalas og dul-an na sa napulo ka mga tawo kagahapon.

Nagkarakara kagahapon sa pagpahakot sa liboang mga tawo ang nagkadaiyang rescuers sa aron malikayan ang pagkatanggong sa ilang mga balay nga hapit na malapawi sa tubig baha diha sa atop.

Sagad sa mga nakalas mga batang gipang-anod sa sapa atol sa ilang paglabang ngadto sa mas luwas untang lugar.

Gipahibalo sa Philippine Atmospheric Geophysical and Astronomical Service Administration nga walay bagyong misulod sa nasud u gang pagbunok sa ulan epekto lang kini sa pagkusog sa habagat. Niadtong milabay’ng semana gibahaan ang dakong bahin sa Luzon tungod sa bagyong Gener ug karong mibunok ang uwan misamot kini og maayo. Ang bagyong Gener mikalas og 53 ka tawo.

"It's like a water world," maoy paghulagway ni Benito Ramos, ang pangulo sa National Disaster Risk Reduction Management Council ug miingon nga 50 porsiyento sa Metro Manila ang gilunopan.

Sa barangay Commonwealth sa Quezon City lima ka balay ang natabunan sa midahiling yuta ug lima ka tawo natabunan ug nangamatay samtang tulo ang naangol.

Giawhag kagahapon ang mga residente nga biyaan ang ilang mga balay nga daan nang agianan sa baha. Mas gikabak-an sa gobiyerno ang pagtak-op sa kagabhion tungod kay mas lisod unya pangitaon ang mga nangatanggong sa ilang mga balay. (BANAT NEWS)