267 ka hugawan gisikop sa Scouts

CEBU, Philippines - Mas maayo gyung ang moimplimentar sa pipila ka mga balaod sama na lang niining kabahin sa pag-amping sa kalikupan kun ang kabataan maoy himuong magbalantay sanglit mas agresibo sila sa ilang gibuhat itandi sa mga gisweldohang magbalantay.

Sulod sa duha ka oras lang nga pagbantay sa 86 ka mga Girls Scouts ug Boys Scouts sa Mandaue City Science High School 267 ka mga tawong mga hugawan ug nagpataka og labay og basura ang ilang nadakpan diha sa dalan S.B Cabahug sa barangay Ibabao sa dakbayan sa Mandaue. Ang pagpanakop kagahapon sa buntag gikuyugan nilang Ibabao barangay Kapitan Carmelino del Mar, Engr. Ricardo Mendoza, director sa barangay Solid Waste Management Program ug sa mga eco-wardens sa nahisgutang barangay.

Ang head scout nga si Cherry Dionson nagkanayon nga sagad sa ilang mga nadakpan kagahapon sa buntag pulos nanglabay og upos sa sigarilyo , plastik nga botelya, panit sa kendi ug nagpataka og pagpangluwa.

Hinuon wala sila dayon pamultaha sanglit igo ra silang gi-warningan nga sa sunod higayon nga sila masakpan isyuhan na sila og citation ticket ug pabayron sa P500 nga multa subay sa Anti-Littering Ordinance sa syudad. Kung dili sila makabayad sa multa sulod sa 72-oras adto na nila kini atubangon sa korte.

Si Ryan Amamang-pang, BSP coordinator nagkanayon nga nalipay iyang mga scouts nga nakaapil sa pagtabang sa komunidad sa kampanya sa kalimpyo sa siyudad ug misugyot nga andam silang motabang pag-usab bisan kausa sa usa ka buwan. (BANAT NEWS)