Kauban ni Jun Cabando napatay

CEBU, Philippines - Kauban ni Dionesio Cabatingan alyas “Jun Jun Cabando” ang napusilan patay sa ilang gitulis nga negosyante nga misukol og pinusilay ug napatay usab niadtong Lunes sa hapon ngadto sa Bonifacio, Misamis Occidental sumala pa sa usa ka opisyal sa kapolisan.

Si Chief Inspector Romeo Santander, hepe sa City Intelligence Branch (CIB) mibutyag niini sa mga tigbalita kagahapon nga base sa ilang nadawat nga report, napatay niadtong Lunes si Francis Raagas, 31, human mapusili sa usa ka negosyanteng ilang gitulis. Si Raagas giingong nakaangkon og duha ka samad pinusilan sa iyang lawas human ang negosyanteng ilaha untang tulison misukol ug nakigpinusilay kanila nga miresulta sa kamatayon sa tulisan ug pagkaangol sa kauban niini ug nadakpan usab sa hot pursuit operation diha na sa Ozamis City.   

Kahinumduman nga si Raagas giingong usa sa kauban ni Cabando sa pagpanulis sa China Bank diha sa Robinson Mall sa Fuente Osmeña, dakbayan sa Sugbo sa milabay’ng tuig.

Duha ka gwardiya ang namatay ug duha ka polis ang naangol kinsa nakigpinusilay sa grupo ni Cabando. Tulo usab sa kauban ni Cabando ang napatay sa maong insidente.

Ang giingong laing kauban ni Cabando nga si Rolien Castro nasikop sa kapolisan sa milabay’ng buwan diha sa lungsod sa Minglanilla, samtang nadakpan usab ang kapuyo ni Cabando nga si Merly Lagitaw.

Si Raagas usa sa tulo ka John Does sa warrant of arrest sa kasong robbery with homicide nga giluwatan ni Regional Trial Court (RTC) Judge Wilfredo Navarro kalabot sa Robinson’s Mall robbery.

Matud ni Santander nga karong napatay na si Raagas ug nadakpan ang gitumbok nga lider nga si Jun Cabando ug mga kaubanan niini sa pagtulis sa China Bank makonsiderar nang sulbad na ang kaso. (Brenda D. Batuto ug Niña G. Sumacot sa The Freeman/EIM)

Nakuyapan tungod sa aso

Ni Brenda Batuto

Usa ka 19-anyos nga babaye ang nawad-an og panimuot tungod sa pagkahanggab niini og bagang aso kay nasunog na diay ang silong sa gipuy-ang panimalay kagahapon sa kaadlawon diha sa 50-2 Andres Abellana St., barangay Guadalupe, dakbayan sa Sugbo.

Ang na-suffocate mao si Catherine Gallardo, nagpuyo diha sa usa sa mga unit sa 5- door apartment nga nasunog ang daling gidala ngadto sa tambalanan kinsa gitabang sa mga rescuers nga makagawas ug gidala sa Cebu Doctors Hospital.

Gikabalak-an kung wala pa kini mahibaw-ing diha sa ibabaw natulog hayan posibleng mas grabe pang kadaot sa panglawas o ba kaha ngadto sa kamatayon ang mahitabo kang Gallardo.

Si SFO3 Roylin Maratas sa Cebu City Fire Bureau sa pakighinabi niini sa Banat News kagahapon mibutyag nga nadawat nila ang alarma sa sunog alas 4:33 kagahapon sa kaadlawon ug mga alas 4:40 na-fire out na nila kini.

Matud ni Maratas nga partially burned ang lima ka bahin sa apartment nga gipanag-iya ni Jocelyn Go.

Ang maong apartment gama kini sa semento ug gaay nga mga material ug gibana-banang mikabat lang ngadto sa P10,000 ang danyos sa maong sunog.

Ang kalayo sa sunog naggikan kini sa silong nga bahin sa apartment nga giukopahan ni Johana Baron.

Usa sa gitutokan sa kabomberohan sa maong sunog mao ang electrical misused apan ipatawag pa nila si Baron ug Go alang sa imbestigasyon. (BANAT NEWS)