2 ka tiguwang gipamusil angol

CEBU, Philippines - Duha ka mga tiguwang ang naangol human sila pamusila didto sa Sitio Tal-ot, sa barangay Mainit, siyudad sa Naga sa miaging Domingo sa hapon.

Ang mga biktima mao si Gregorio Yapac, 61, minyo, nga taga Sitio Tagaytay barangay Tinaan, sa maong dakbayan ug si Vicenta Erediano, 75, byuda ug silingan ni Yapac.

Samtang ang suspek mao si Eduardo Lapitan, 60, nga silingan sa mga biktima.

Si PO2 Ronjie Nadora, desk officer sa Naga City Police Station mibutyag sa Banat News nga sa wala pa ang pagpamusil, si Erediano, 52, kinsa anak ni Vicenta, nag- estorya ug si Yapac dihang nasigpatan kini sa   suspek.

Ang suspek nga daan nang nagdumot kang Erediano mikuha og armas de fuego sa ilang balay ug diha-diha gipusil si Erediano.

Gumikan sa kaabtik sa naulahi wala gayud kini maigo, apan ang nasabak sa mga bala mao sila si Yapac kinsa naigo sa paa ug ang inahan ni Erediano nga si Vicenta nga naigo usab sa bat-ang.

Ang suspek misibat dayon human sa hitabo samtang ang mga biktima gihatod usab dayon ngadto sa Vicente Sotto Memorial Medical Center sa dakbayan sa Sugbo.

Kagahapon sa buntag ang suspek boluntaryong nitahan sa iyang kaugalingon sa kapolisan ug nagtingkagol na karon sa prisohan samtang gihikay ang kasong ipasaka batok niya. (BANAT NEWS)