Gwen mosuporta sa e-sports

CEBU, Philippines - Misaad si Governor Gwendolyn Garcia nga andam siya nga mosuporta sa pagpalambo sa Electronic Sports (E-SPORTS) sa nasud.

 Gipadayag   sa gobernador ang kasibot niya niini human siya bisitahi sa mga opisyal sa Philippine E-Sports Organization nga gipangunahan sa presidente niini nga si Brian Lim.

Ang tuyo ni Lim ug mga kauban mao ang pagpangayo og suporta ni Gobernador Garcia ug nalipay kaayo ang grupo human madawat ang pasalig sa nahauna nga siya nay moabaga sa logistics kon mga gastohunon sa ipahigayon nga Philippine National Qualifier dinhi sa Sugbo.

 Gipasabot usab ni Lim nga sa e-SPORTS ikapasundayag   sa magduduwa nga mga Pinoy ilabina sa mga Sugboanon ang ilang talento ug abilidad sa pagduwa sa nagkadaiyang mga games sa computer sanglit dili babag sa maong matang sa sports ang gitas-on, gibug-aton ug edad.

Ang Pilipinas usa sa 40 ka mga nasud nga sakop sa International e-sports Federation.

Ning maong kalamboan ikapasigarbo na usab sa mga magduduwa nga Sugboanon ang ilang hiantigohan nga modernong matang  sa duwa nga sarang makapabantog na usab sa Sugbo sa nagkalainlaing matang sa kompetisyon.

Sa pagkakaron wala pay schedule kun kanus-a ipahigayon ang qualifying test niini dinhi sa lalawigan.  (BANAT NEWS)