Nutrition award nadawat sa taga Toledo

CEBU, Philippines - Ang pagsakripisyo sa pagpahibawo sa matag pamilya sa pagpanghinlo sa palibot paglikay sa sakit nga dengue ug sa pag-atiman sa pagkaon og mga utanon ug prutas nakapalampos kang Jocelyn T. Brazon sa barangay Calong-calong, dakbayan sa Toledo pagdawat og nutrition honor award gikan sa National Nutrition Council (NNC)7.

Si Brazon kinsa usa sa mga nakadawat og ganti atol sa culmination program sa nutrition month sa miaging Biyernes mibutyag sa Banat News  nga ang nakapadasig kaniya sa pagpatugbaw sa kampanya bahin sa nutrition mao ang iyang gugma sa iyang mga silingan sa dakbayan sa Toledo.

Ang pagpabasa niya ngadto sa matag pamilya bahin sa mga kasayoran nga gipasaw-an sa NNC bahin sa mga sustansyadong pagkaon, nakabaton usab og epekto ngadto sa mga molupyo ug naluwas ang kadaghanan gikan sa sakit nga dengue.

Gipasabot niya nga ang pagpanghinlo matag karon ug unya sa palibot maoy nakapaluya sa mga lamok sa dengue sa pagdagsang sa usa ka lugar.

Apan labaw sa tanan gikampanya niya nga aron lig-on ang lawas sa matag sakop sa pamilya gikan sa mga bata hangtod sa mga hamtong ug tiguwang batasanon niini ang pagkaon og utanon ug prutas matag adlaw. Nasuta ni Brazon nga matag pamilya sa dakbayan sa Toledo ilabi na anaa sa bukirang bahin sa siyudad may umahan sa utanon ug prutas.

Alang kang Brazon wala siya mag-apas sa award nga gihatag kaniya sa NNC apan ang mahinungdanon kaniya nga misanong ang katawhan sa kampanya pagbaton og makaon nga puno sa nutrisyon matag adlaw. (BANAT NEWS)