Pagsambog og NFA rice lisud

CEBU, Philippines - Maglisud ang mga negosyante og bugas sa pagpamaligya og adulterated rice o commercial rice nga sambogan og NFA rice kay maalakanse sila kun ila kining buhaton.

Mao kini ang pasalig ni Edgar Diez ang Enforcement and Investigation Officer sa National Food Authority (NFA) 7 atol sa pakighinabi sa Banat News.

Matud pa ni Diez nga gawas nga gimonitor nila pag-ayo ang mga baligyang bugas sa kamerkadohan sa lalawigan sa Sugbo, maglisud pagpasaka   ang mga negosyante og bugas sa ilang presyo kun isagol nila ang NFA rice sa ilang baligya.

Kini tungod kay ang NFA rice karon fortified na o gisagolan na og mga material nga sustansyado busa bisan ang kalidad o hitsura niining  bugasa dili na madanihon.

Tungod sa mga gisambog niini dili na kaayo siya puti tan-awon lahi sa mga de kalidad nga humay karon nga nindot kaayo og lugas busa makapadaning tan-awon ug nindot usab ang presyo.

Matud pa ni Diez nga ang NFA fortified rice nagpabilin gihapong P27 matag kilo ug tungod kay menus ang mga negosyante nga namalit niini, hinungdan nga nagsugwak karon ang stock niini sa mga bodega sa NFA dinhi sa Sugbo.

Kaniadto sa mga puti pa kaayo ang bugas sa NFA, nabaniog nga daghan kaayong mga negosyante og bugas nga mipahimus niini pinaagi sa pagsambog og NFA rice sa ilang commercial rice.

Gumikan sa kanindot sa kalidad sa bugas sa NFA kaniadto daghang mga negosyante ang miburot sa dagkong ginansya tungod kay barato ra ang presyo sa NFA rice apan ikabaligya nila og mahal kun ikasagol na kini sa commercial rice.

Midugang si Diez nga gumikan sa dili madanihong hitsura karon sa NFA rice, dili na mokompiyansa ang mga negosyante sa pagsambog niini sa ilang de kalidad ug mahalon nga humay kay sigurado gayud nga maalakanse sila.

Hinuon matud pa ni Diez nga nihit kaayong makita sa kamerkadohan karon ang NFA rice tungod kay walay daghang nangompra niini.

Midugang siya nga ang kusog mokunsomo sa NFA rice mao ra kadtong mga tawo nga suhito ug nasinati sa kasustansyado niining    bugasa.

Matud pa ni Diez nga gumikan sa kadaghang stock sa NFA  rice sa nasud, kun makapangompra man gani ang kagamhanan og bugas ngadto sa gawas karong sunod tuig malagmit dili na makaabot og 500,000 metriko toniladas nga maoy importasyon sa nasud niining tuiga.Sayo niini misaad ang kagamhanan nga hunongon na ang importasyon sa bugas sugod sa tuig 2013.

Hinuon sa bahin ni NFA Provincial Manager Nestor Rey Alcoseba, dili pa siya makasiguro nga way importasyon og bugas sa sunod tuig.

Apan matud ni Alcoseba nga naningkamot ang kagamhanan sa paghatag og suporta ngadto sa mga mag-uuma sama sa gitunol niining mga kahimanan sa irigasyon ug uban pang pasilidad aron modaghan ang ani sa humay ug mais dinhi sa nasud. (BANAT NEWS)