Maamo moatbang kang Del Mar sa norte

CEBU, Philippines - Usa ka doktor ug kanhi mayor ang pormal nga mipahibawo nga maoy mo-atbang ni kanhi kongresista Raul del Mar kinsa subling magpapili hulip sa iyang anak nga si kongresista Cutie del Mar sa eleksiyon karung sunod tuig.

Atol sa gipahigayong consultative meeting tali sa mga urban poor sa mga barangay sa North District niadtong miaging adlaw, pormal nga gipahibawo ni Dr. Marlo Maamo   nga magpapili siya sa pagka-kongresista sa north district atbang   ni Del Mar.

Si Dr. Maamo lumad nga taga Maria Luisa Village sa barangay Banilad apan didto na magtungha sa elementarya, ug high school sa Liloan, Southern Leyte ang lugar nga natawhan sa iyang inahan ug karon usa na siya ka doktor.

Gani napili usab siyang mayor didto sa Liloan, Southern Leyte sa usa ka termino ug pagkahuman, mibalik siya uban sa iyang pamilya nganhi    niadtong 2008.

Matud ni Dr. Maamo nga naaghat siya nga magpapili pagka -kongresista sa North District sa sunod tuig   nga piniliay aron hatagan og pagtagad ang problema sa kahimsog sa panglawas dinhi sa dakbayan ilabina sa mga kabus nga molupyo.

Miingon si Dr. Maamo   nga gikinahanglan ang dugang tulo ngadto sa 4 ka public hospital dinhi sa dakbayan ilabina sa north district aron pagpaluag sa naghuot na nga mga kabus nga pasyente sa Cebu City Medical Center (CCMC).

Gusto usab niyang ikapatuman sa hingpit ang libreng hospitalization sa tanang molupyo nga wala’y health card aron makapahimus ang tanan nga patas.

Alang kaniya ang pagpalig-on sa health care services maoy nakita niya nga gikinahanglan karon sa mga molupyo sa north district ug dili ang pagtukod og dugang mga fly over nga maoy bugtong gitinguha karon ni kanhi kongresista Del Mar ug sa iyang anak nga si Kongresista Cutie del Mar.

Ang Federation chairman sa Urban Poor Solidarity Federation nga si Samsen Chu mihangop sa plataporma de gobyerno ni Dr. Maamo ug nakigsabot sa mga kaubanan niyang mga lider sa urban poor sa paglusad og signature campaign aron irekomendar ang kandidatura ni Dr. Maamo nga malakip sa line up sa Team Rama karong nakita nila nga wala pa kini klarong kandidato pagka- kongresista sa North district.

(BANAT NEWS)