Pito nahilo sa butete

CEBU, Philippines - Nalandig sa tambalanan ang pito ka tawo lakip na niini ang tulo ka menor de edad human gikatahong mikaon og butete pasado alas-10 niadtong Sabado sa buntag diha sa barangay Hilotongan lungsod sa Bantayan.

Ang mga nahilo mao sila si Alejandro Minguito, 51; Alvin Minguito, 13; Rich Kay Minguito Rayco, 11; John Vincent Minguito, 9; Dionisio Abrasada, 53; Joseph Abrasada, 33; ug Joel Abrasada, 23.

Sa imbestigasyon sa kapolisan sa lungsod sa Bantayan nasayran nga sa wala pa mahitabo ang pagkahilo sa pito giingong si Alejandro gihatagan og usa ka kalteks nga isdang butete sa mananagat nga si Glenn Orpisa Opril alyas Dodong.

Tungod kay naanad naman sila sa pagkaon niini gidala kini ni Alejandro sa ilang balay aron sud-anon sa pamahaw.

Duha ka oras ang milabay human makapamahaw ang banay’ng Minguito nga ang gisud-an mao ang butete kalit nga nakabatyag og pagpanglipong si Alejandro ug nagsukasuka.

Tungod niini, daling gidala sa Bantayan District Hospital si Alejandro apan pipila ka minutos ang milabay susamang gipamati ang gireklamo sa mga apo niini nga nakakaon usab sa maong isda hinungdan nga gidala usab sila sa maong tambalanan. Base sa report sa attending physician sa maong tambalanan nga Dr. Edgar Abelgas, kasamtangan pa nilang gipaubos sa obserbasyon ang upat sa pito ka biktima samtang ang tulo niini anaa na sa stable nga kundisyon.

Sa nasud sa Japan, ang butete o buriring o fugu fish sa Japan, gikonsiderar nga delicacy ug dili kini basta lutoon lang og ordinaryong kusinero o chef sanglit lisensyadong chef lang nga gitugotan sa gobiyerno sa Japan nga makaluto niini.

Ang lisensya makuha lang human sa lisod nga training sulod sa pipila ka bulan nga naglakip sa pagtuon sa hustong pagpili, pag-andam, paglimpyo ug pagluto.

Bisan paman lisensyado ug pipila ka tuig nang gihimo sa mga eksperto sa Japan ang pagluto niini duna gihapoy nga panahon nga may mahilo ug madala sa tambalanan.

Niadtong 1984 gi-ban sa Japan sa mga restaurant ang pag-serve sa atay ug kidney sa butete tungod kay mao kini ang parting dunay daghang tetrodotoxin nga hilo.

Wala’y tambal pangontra o antidote batok sa tetrodotoxin nga mo-paralyze sa kaunoran sa makakaon niini. Maparalisa ang pasyente apan nagmata kini ug nasayod sa panghitabo sa palibot niini.

Bugtong mahimo sa mga tambalanan mao nga mamentinar silang makaginhawa hangtud nga molurang ang epekto sa hilo pinaagi sa pag-ihi ug kalibang una pa kini maulian.

Dinhi sa Sugbu, ang mga tinugyanan sa panglawas ug ang kapolisan padayong mipasidaan sa publiko nga likayan na ang pagkaon niini ilabi kay dili suhito ang mga mananagat sa pag-andam niini. Ang Bureau of Fisheries and Aquatic Resources mipagawas na og kamandoan sa pagdili pagkuha, pagbaligya ug pagkaon og butete o buriring tungod kay makahilo gyud kini. (BANAT NEWS)