CEBU, Philippines - Tumong sa Banat Manobela nga matabangan ang publiko ilabi na ang mga motorista pagsabot sa nagkadaiyang traffic signs alang sa kaluwasan sa tanan.
CAUTIONARY SIGNS: Kini ang mga traffic signs nga triyanggulo (triangle) nga nagpasabot kinahanglan ang dugang pag-amping sa mga road users.
Kung magkaduol ka niini kinahanglang masusi dayon kung unsa ka kurbadahon niini ug pangita og laing traffic signs nga makagiya nimo. Aron pagsigurong dili ka makabangga sa makasugat nga sakyanan minusi ang speed aron kung dunay kinalitkalit nga hitabo makahunong ka dayon ug makalugar sa daplin sa dalan. Tips: batasana ang pagsusi sa side mirrors, tan-awa ang palibot, sakto ra ang speed ilabi na kung dautan ang panahon.
Sa Kasaysayan Karon
Agosto 5
Maphilindo
1963— Gitukod ang MAPHILINDO nga gitawag usab nga Greater Malayan Confederation, usa ka organisasyon nga gilangkuban sa nasud sa Malaysia, Philippines, ug Indonesia pinasikad sa inisyatiba ni kanhi presidente Diosdado Macapagal. Kini kabahin sa damgo ni Dr. Jose Rizal nga panaghiusa sa mga Malayo nga nasyon nga nabahinbahin tungod sa kolonyanismo. Apan nabungkag kini tungod sa polisiya ni kanhi Indonesian President Sukarno nga gitawag nga Komprontasi nga direktang nagpadagan og pagbabag nga mahimong independente ang Malaysia isip usa ka nasud.
Traffic Light
1914— Unang gipaila ug gigamit sa kadalanan ang unang electric traffic lights nga tumong aron makontrol ang dagan sa trapiko. Kini gihimo sa eskina sa Euclid Ave. ug E. 105th St. sa Cleveland, Ohio, USA. Ang kolor sa traffic signals pula lang ug berde nga gibutang sa usa ka poste sa eskina nga gi-operate og usa ka tawo sa usa ka gamay’ng control booth sa dalan. Bagtingan usab ang mga drayber aron makabantay nga nausab na ang kolor. Ang unang traffic control light gigamit sa London, England niadtong Disyembre 10,1868 apan lamparilya lang kini nga migamit og gas.
Honda Motors
1991— Namatay ang Japanese engineer, race car driver ug industrialist nga si Soichiro Honda sa edad nga 84. Si Soichiro maoy mitukod sa sikat karong motor company nga Honda Motor Company. Si Honda usa lang ka garage apprentice (1922) o boy sa machine shop apan nangandoy og taas ug nakapatukod og kaugalingong garage shop niadtong 1928. Una niyang produktong nahimo ang piston-ring (1934) ug misunod ang motorsiklo (1948) dayon sports car ug light trucks (1963) hangtud karong mga panahona naila ang de kalidad nga sakyanang ginama sa Honda. – (BANAT NEWS)