Triathlon Re-Routing

CEBU, Philippines - Lakip sa gipangandaman sa upat ka mga traffic divisions sa upat ka mga dagkong siyudad sa Metro Cebu nga maoy venue sa Cobra Energy Drink Ironman 70.3 Triathlon Philippines mao ang re-routing sa mga sakyanan sa mga kadalanan.

Ang Lapu-lapu, Mandaue, Cebu City ug Talisay nakapangandam na niining international sporting event nga mahitabo dinhi sa Cebu nga tambungan og dili lang mga de kalibreng Filipino athletes tambongan usab kini og mga langyaw’ng atleta.

Sa Talisay City

Si Gerard Lariego, pangulo sa traffic enforcers sa Talisay City mipahibalo nga ang tibuok South Road Properties (SRP) gikan sa Lawaan kutob sa fish port sirad-an sugod alas 4:30 sa kaadlawon hangtud alas-12 sa udto.

Gisayo sa Talisay ang pagpasira aron kung dunay mahitabong aksidente sa dili pa magsugod ang event matangtang kini dayon ug ingon man makaplastar ang mga organizers sa ilang water station sanglit ang Talisay man maoy turning point.

Ang mga road junctions sa Talisay diha sa San Roque, Laray, Rabaya, Polong Depareine St., Prisco Depareine St., ug Mojon, Pook roads, mahimong makatabok ang mga tricycles ug jeepneys kutob lang 6:30 am.

“Amo lang tang gihangyo nga sa kung mangupra sila, pwede sa Sabado sa gabii or inug human na lang sa event and for those who will go to the malls with their families for recreation, inig human na lang pod sa event,” matud pang Lariego.

Sa rerouting scheme, ang mga sakyanan gikan sa Lagtang Public Market, mo-right turn sa Tabunok flyover padulong sa Lawaan, Linao dayon left turn sa Linao atubangan sa KIA Motors, dayon balik sa city hall, kutob ra sa Dumlog junction ang buot moadto sa Dumlog, Poblacion, Cansojong, San Roque ug Tangke.

Mandaue City

Sirad-an sugod 4:00 am hangtud 12:30 pm ang mga dalan nga maagian sa mga atleta. Ang mga jeepneys padulong sa Mandaue gikan sa Liloan ug Consolacion nga may plakang katapusang numero nga 2,4,6,8,0 (even numbers) adto mosubay sa M.C. Briones St., liko sa wala sa A.C. Cortes Ave., tuo sa S.B. Cabahug St., tuo sa A. del Rosario St. padulong sa ilang destinasyon.

Ang mga PUJ balik sa Consolacion ug Liloan gikan sa Banilad nga may mga plakang ang tumoy may numerong 1,3,5,7,9 (odd numbers) anha mosubay sa A.S. Fortuna Ext., left turn sa A. del Rosario st., left turn sa S.B. Cabahug St., balik sa destinasyon.

Ang tanang PUJ padulong sa Mandaue Ibabao gikan sa Cebu City nga may plakang ang tumoy “even numbers” mosubay sa A. del Rosario St., right turn sa B. Ceniza St., left turn sa S.B. Cabahug St., right turn sa P. Burgos St. right turn sa A.C. Cortes Ave., balik sa destinasyon.

Ang tanang PUJ nga Mandaue Ouano gikan Cebu City mosubay sa A. Del Rosario St., right turn sa B. Ceniza St., left turn sa S.B. Cabahug St., right turn sa C. Ouano St., left turn sa P. Burgos St. left turn sa Zamora St. balik sa Cebu City.

Samtang ang mga PUJ gikan sa Lapu-lapu padulong sa Mandaue anha molabang sa Marcelo Fernan Bridge lahos sa U.N. Ave., left turn sa M.C. Briones St. (Pacific Mall) padulong sa ilang destinasyon.

Ang mga PUJ ug pribadong sakyanan padulong sa Lapu-lapu ug Mactan Airport mosubay sa S.B. Lopez Jaena St., lahos M.C. Briones St., right turn sa U.N. Ave. ngadto na sa Marcelo Fernan Bridge padulong sa ilang destinasyon.

Ang tanang sakyanan gikan Mandaue proper padulong sa Mactan Airport mosubay sa S.B. Cabahug St., padulong Pacific Mall right turn sa U.N. Ave. ngadto na sa Marcelo Fernan Bridge padulong sa ilang destinasyon.

Ang mga tricycles usab sa Looc padulong Mandaue Proper ug balik anha mosubay sa C. Ouano St., hangtud sa U.V. traffic light ug balik sa ilang destinasyon.

Kadtong gikan sa Umapad ug Opao padulong sa Mandaue Proper ug vice versa anha mosubay sa G. Ouano St. kutob sa Tita Guwapa ug balik sa destinasyon samtang ang gikan sa Labogon ug Paknaan padulong sa Mandaue Proper ug vice versa anha mosubay sa P. Burgos St., right turn sa Zamora St., left turn sa Avancena St., left turn sa P. Burgos St., lahos sa ilang destinasyon.

Cebu City

Samtang ang mga sakyanan padulong sa Northern Cebu gikan Cebu City mosubay sa Lopez Jaena St., padulong sa M.C. Briones St. subay sa J.P. Rizal St., padulong sa destinasyon.

Ang mga sakyanan gikan Cebu City padulong sa Mandaue Proper anha mosubay sa Lopez Jaena St. padulong A. del Rosario St. lahos sa ilang destinasyon.

Ang mga pribadong sakyanan gipahimangnoang sundon ang mga gipamutang nga traffic signs aron malikay sa kalangay sa ilang biyahe tungod sa kalibog.

Lapu-Lapu City

Samtang sa Lapu-lapu City gipaabot nga nasayod nang daan ang mga residente sa mga dalang tak-opan tungod sa sayong pagpakatap sa impormasyon ug giawhag sa siyudad ang publiko nga manan-aw ug moabiba sa mga atleta ingon man ang pagtambong sa Race Dance, nga usa ka street party sa M.L. Quezon national highway. Hinuon dunay mga traffic enforcers ug kapolisan nga ipakatap aron motabang paggiya sa mga motorista kung sila masaag. – (BANAT NEWS)