One Cebu Expo gibuksan

CEBU, Philippines - Pormal na nga gibuksan ni Governor Gwendolyn Garcia ug mga kaubang opisyal ang One Cebu Expo sa Cebu International Convention Center (CICC) sa miaging Biyernes didto sa CICC nga maoy usa sa mga dakong bahin sa pagsaulog sa lalawigan sa ika-443 ka tuig nga anibersaryo niini.

Kauban sa gobernador mao sila si Cong. Pablo John PJ Garcia; Vice Gov. Mark Leviste sa lalawigan sa Batangas; Dame Mariqueta Salimbangon Yeung; Enrison Benidecto, ang chairman sa One Cebu Expo, mga opisyal sa Cebu Chamber of Commerce and Industry (CCCI) ug sa Mandaue Chamber of Commerce and Industry (MCCI).

Gibanabana nga mikabat sa 4,000 ka mga dumoduong, ang mitambong sa pagbukas sa maong kalihokan ug mibisita sa CICC.

Gipasundayag sa maong kalihokan ang mga produkto sa Obra Negosyo Eskwela sama sa Itilo Felgor RTW kon ready to wear sa lungsod sa Cordova; Soling’s Bakeshop sa Alcoy; Pintos sa Bogo; Korpek Jand G sardines sa Bantayan; Takyong Products sa Borbon; Coconut Vinegar sa Pilar; Sarok sa Consolacion; Judylyn Handicraft ug pickled mixed vegetables sa Dalaguete; Llyod Carriaga Furnitures; Casava cookies with Malungay sa Tudela Camotes; Alimango Culture sa Carmen; Charcoal Briquettes kon uling sa Tabugon; Tableya sa Sogod; Mayols Bibingka sa dakbayan sa Mandaue.

Nakadayeg pag-ayo si Vice Governor   Leviste sa nagkalainlaing mga produkto nga gipasundayag sulod sa CICC ug nangandoy siya nga mahimong sister city sa lalawigan sa Batangas ang Sugbo .

Naghatag og dugang bulok sa maong kalihokan mao ang gipahigayon nga fashion show. Bisan si Bayan Muna Partylist Rep. Teddy Casino nga mitambong sa maong kalihukan nakadayeg pag-ayo sa maayong pagka-desinyo sa One Cebu Expo 2012.

Samtang si Congressman Pablo John “PJ” Garcia mibutyag sa dako niyang kahinangop sa maayo kaayong pagkahan-ay nga mga display sa mga nagkalainlaing produkto nga gi- exibit sulod sa CICC.

Laing mabulokong pasundayag sa maong kalihukan mao ang mga presentasyon sa nagkalainlaing grupo sa mga performer.

Human sa pormal nga pagbukas sa One Cebu Expo ug Cebu Goes Culinary, si Gov. Gwen Garcia nangulo usab sa pagbukas sa One Cebu Inter Auto Club Meet didto gihapon sa CICC. – (BANAT NEWS)