Patay gidagsa sa Biasong, Talisay

CEBU, Philippines - Usa ka patay’ng tawo nga naghubo nadagsa sa baybayon sa barangay Biasong, dakbayan sa Talisay   niadtong Biyernes sa hapon.

Sila si SPO1 Edgar Causon ug SPO1 Benjamin Sebellita maoy daling miresponde sa maong alarma.

Ang maong tawo gibana-banang nagpanuigon og 70-anyos, may gitas-ong 5’2 ug tabonon ang pamanit.

Ang mga polis nga misusi sa patay’ng lawas nagtuo   nga nalumos kini sa kadagatan sa Talisay ug tungod sa kadagko sa bawod gibanlas kini ngadto sa baybayon sa Biasong. Ang nakabangal sa patay’ng lawas mao sila si Jaylord Llanos ug ang usa nga nailhan lang sa ngalang Benarao kinsa maoy daling nangayo og panabang sa ilang silingan.

Sa pagkakaron gihaya kini sa Saint Francis Funeral Homes sa barangay Bulacao, Talisay ug nagpaabot sa mga paryente nga moila niini. – (BANAT NEWS)