2 ka tulisan nasikop

CEBU, Philippines - Nasikop sa kapolisan ang duha ka suspetsadong tulisan human tulisa niini ang usa ka call center agent sa Barangay Jagobiao dakbayan sa Mandaue kagahapon sa kaadlawon.

Ang biktima mao si Pinolin Saludra, 32, nga taga lungsod sa Liloan ug usa ka call center agent. Nailhan   ang mga suspetsado     nga sila si Carl Bugtai, 18 , ug Ferdinand Manlangit, 30, pulos taga Pitogo, lungsod sa Consolacion.

Sa imbestigasyon sa kapolisan sa Station 3 sa Mandaue City Police Office (MCPO) nasayran nga sa ala 1:30 kagahapon sa kaadlawon luwan sa usa ka PUJ si Saludra gikan sa lungsod sa Liloan paingon sa dakbayan sa Sugbo ug sa pag-abot niini sa unahan, misakay   usab ang duha ka suspetsado.

Pipila ka gutlo samtang nagdagan ang PUJ kalit lamang gitionan sa duha ka suspetsado og kutsilyo ang biktima dayong deklarar nga tulis.

Ang biktima kinsa nahadlok nga patyon mitunol sa iyang cell phone ug dayon kalma kaayo kining nanganaog sa sakyanan.

Maoy hinungdan nga pag-abot sa Mandaue midangop si Saludra sa kapolisan sa Station 3 sa MCPO kinsa mihimo dayon og follow-up nga misangpot sa pagkasikop nila ni Bugtai ug Manlangit didto sa S. Abellana, Barangay Canduman, sa dakbayan sa Mandaue.

Nasakmit sa kapolisan gikan sa mga suspetsado   ang cell phone ug kwarta nga iya ni Saludra. Sa pagkakaron gitanggong sa prisohan ang mga suspetsado samtang giawhag sa kapolisan ang mga nabiktima sa tulis didto sa amihanang bahin sa lalawigan nga ilang tan-awon ang maong mga suspetsado kun mao ba kini ang mibiktima kanila aron kapasakaan kini og bug-at nga kiha. – (BANAT NEWS)