Hipnotismo gigamit sa pangilad

CEBU, Philippines - Usa ka negosyanteng babaye ang nangangkong na-hipnotismo siya sa usa ka tawong mangingilad diay ug misakiyo sa iyang P150,000 nga kantidad sa mga alahas ug salapi diha sa sitio Cawayan sa barangay Pitogo sa lungsod sa Consolacion ala-una pasado ang takna sa hapon niadtong miaging adlaw.

Ang biktima mao si Cristina Delima Pepito, 31, biyuda nga taga barangay Tayud sa nahisgutang lungsod. Usa ka wala mailhing babaye nga nagpangidaron og 30-anyos pataas ug kasarangan ang panglawas maoy gitumbok niyang miilad kaniya. Si PO1 Baltazar Francisco sa kapolisan sa maong lungsod nga nahinabi sa Banat News miingon nga gikan pa nga nangompra ang biktima ug paingon na kini pauli sa ilang panimalay. Dugang pa niya nga samtang nagpaabot kini og sakyanan sa maong lugar giduol siya sa maong babaye ug gilingawlingaw siya sa pag-estorya-estorya.

Sumala sa giasoy sa biktima nga daw na-“hypnotized” kini sa maong babaye ug nawala siya sa kaugalingon ug wala na kini makabalibad dihang gikuha niini ang dalang salaping cash nga P48,000. Lakip sa gikuha sa babaye ang upat niya ka kwintas nga bulawan nga P88, 000 ang kantidad, duha ka singsing nga bulawan nga P30,000 ang kantidad, tulo pa ka silver nga singsing nga P30,000 ang kantidad, mga earings, wedding ring ug ingon man mga groceries nga iyang kinompra. Gitug-an sa biktima nga daw nawad-an kini sa iyang umoy sulod sa pipila ka gutlo nga pagpakig-estorya sa maong babaye ug wala na kini makabalibad dihang gipanguha gikan kaniya ang maong mga butang.

Si Francisco miingon nga bugtong nahinumdoman sa biktima nga human makuha ang salapi ug mga alahas nakit-an niya ang maong babaye nga misakay og usa ka awto nga nagdala sa plate number nga WEE- 682 nga gimaneho sa wala mailhing lalaki ug mipabulhot sa pagpadagan pahilayo sa maong dapit. – (BANAT NEWS)