Dive shop gikawatan

CEBU, Philippines - Gibanabanang dul-an sa P200,000 ang nahanaw lakip na ang 50,000 Korean Won gikan sa usa ka dive shop nga gipanag-iya sa usa ka Koreanong negosyante diha sa barangay Maribago, siyudad sa Lapu-lapu .

Gipangita karon ang usa ka kanhi trabahante sa Koreanong si Han Kil Hyung nga dili pa lang niya dugay gitaktak. Ang maong trabahante giingong adunay duplicate sa mga yawe sa drawer sa lamesa nga maoy gibutangan sa maong kantidad.

Ang biktima nga si Han, 35, tag-iya sa Toby Diving Center sulod sa Tambuli Beach Resort sa barangay Maribago midangop sa Theft and Robbery Section (TRS) sa Lapu-Lapu City Police niadtong miaging adlaw sa dihang iyang namatikdan nga wala na ang maong salapi.

Walay laing gidudahan si Han gawas lang sa maong trabahante nga gidudahan niyang nakasulod duha na ka adlaw ang milabay aron kawaton ang maong salapi apan niadto lang Biyernes niya madiskubrehi. Gawas sa salapi nahanaw usab ang usa ka Korean passport, identification cards, credit cards, tseke ug ang official receipt (OR) lakip na ang mga dokumento sa iyang establisamento. – (BANAT NEWS)