Polis mi-deny sa alegasyon sa 'giupawan' apan.

CEBU, Philippines - Usa sa upat ka mga polis nga gireklamong miabuso sa usa ka dinakpan nga gikiskisan ug giupawan ang kusganong mihimakak sa alegasyon apan miangkong gisipa niya sa tiyan ang ilang gidakop aron kini i-neutralize tungod kay nagmaoy kini.

Si PO1 Roel Pepito, sa Sogod Police Station sa pakighinabi sa The Freeman, igsuong pamantalaan sa Banat News nagkanayon wala gyuy kamatuoran ang pasangil ni Danny Montecalbo, 39, nga gikulata nila kini. Matud niya gisipa niya kini makausa tungod kay duna kini gikuptang screwdriver ug nagmagahi kini pagkuyog. “Pagsikad nako kausa natumba na siya una namo nakuha ang screw driver,” matud pa ni Pepito sa phone interview.

Sumala pa niini may gikuptang screwdriver si Montecalbo nga gidakop nila ni PO2 Dario Dinopol, PO2 Jose Hortillano, PO1 Roel Pepito, ug PO1 Lambeto Lobiano, diha sa Barangay Tabunok.

Samtang gihimakak usab ni Pepito nga apil siya sa ‘mikiskis’ sa mga buhok sa kalawasan ni Montecalbo kay wala siya sa pagkahitabo niini ug gani siya pay mipasidaan sa mga piniriso nga di kini pahilabtan. Sumala pa nga Lunes pa unta buhian si Montecalbo apan tungod sa hangyo sa mga ginikanan gibuhian kini pagka-Domingo. Si Montecalbo gisikop tungod sa pagmaoy ug mialegar nga gikulata siya ug giupawan ug gikiskisan sa mga priso.

Si Inspector Aldrin Villacampa ang hepe sa Sogod police mibutyag nga sa iyang imbestigasyon miangkon ang mga priso nga ilang giupawan si Montecalbo hasta sa pribadong bahin sa lawas.

Ang tigpamaba sa National Police Commission Atty. Zandro Ronnie Oriol mikompirmar sa Banat News nga pormal nga gipasaka sa ilang buhatan sa miaging adlaw ang kaso batok sa maong mga polis. ( Lesley Caminade/EIM) - BANAT NEWS