Sa Kasaysayan Karon: Agosto 4
1972—Karong adlawa milurang ang kapin usa ka bulang pagbunok sa ulan ug pagbagyo sa gitawag kaniadtong “Great Flood of 1972” diin gatosan ang nakalas ug minilyon ka tawo sa Luzon ang naapektahan ug binilyon ka pesos ang danyos. Sugod sa bulan sa Hulyo 1972 mibundak ang kusog nga ulan ug nag-abot-abot ang mga bagyo hinungdan sa paghumok og maayo sa yuta ug pagsaka sa mga tubig sa kasapaan hinungdan sa mga kadaot sa mga imprastraktura, kadalanan ug kaumahan. Tungod sa kakulangon sa pagkaon dunay food riot nga nahitabo samtang nagkadaghan usab ang nangasakit og cholera ug typhoid tungod sa dili maayong kundisyon sa pamuyo gumikan sa gibiling danyos sa baha.
13 milyones telepono gipawong
1922—Agi og pagtahod sa imbentor sa telepono nga si Alexander Graham Bell, wala ipagamit sulod sa usa ka minuto ang tanang telepono sa North America karong adlawa Agosto 4, 1922. Si Bell mipanaw niadtong Agosto 2, 1922. Ang tanang switching stations sa AT&T ug Bell System sa US ug Canada misuspenso sa 13 milyones ka telepono sa maong oras. Si Bell gilubong sa gipabuto nga solidong bato sa kinatumyang bahin sa Beinn Bhreagh Mountain sa ilang kayutaan sa Nova Scotia, Canada. Dunay gitukod nga watch tower si Bell sa maong bukid. Ang lungon ni Bell ginama diha mismo sa iyang shop sa iyang mga sakop.
Sentenaryo sa Queen Mother
2000—Nagsaulog sa iyang sentenaryo o 100 ka tuig nga adlaw’ng natawhan si Queen Elizabeth, nga gitawag usab og Queen Mother sa Britanya. Liboang mga supporters ug mga sakop sa British royal family ug uban pang mga royal families sa ubang kanasuran ang mitambong aron lang siya i-greet og happy birthday diha sa Buckingham Palace. Ang Queen Mother mao ang inahan sa kasamtangang rayna sa Britanya nga si Queen Elizabeth II. Namatay ang Queen Mother niadtong Marso 30, 2001 samtang kini natulog sa iyang lawak.
- Latest
- Trending
