Pito Korean seamen nasalbar sa PCG

CEBU, Philippines -  Pito ka mga Koreanong seamen ang naluwas sa mga sakop sa Philippine Coast Guard niadtong Huwebes gikan sa kadagatan sa Capones Point sa Zambales.

Ang maong mga langyaw luwan sa usa ka tugboat nga M/Tug Kosco-202 dihang nakadawat og tawag sa radyo ang PCG action center sa Manila nga nagpakitabang sila ala-una pasado sa kaadlawon.

Sumala pa nga ang maong tugboat nasigpatan 10 nautical miles sa kasadpang bahin sa Capones Point.

Ang pagpangayo og tabang sa mga Koreano naabot usab sa Hong Kong Maritime Rescue Coordinating Centre (MRCC) kinsa mipahibalo usab sa maong alarma sa mga sakop sa Philippine Coast Guard.

Tungod niini ang Coast Guard Northwestern Luzon pinangulohan ni Captain Leopoldo Larroya mipadala sa barkong BRP-EDSA (SARV-002) nga nagbase sa Subic Port ug gitabangan ang mga sakay sa tugboat ngadto sa luwas nga lugar.  Gikan sa Wires/EIM  - BANAT NEWS