RH Bill makalusot gyud-Alcover

CEBU, Philippines - Ang Reproductive Health (RH) Bill nga gidebatihan na pag-ayo karon sa kongreso may purohan nga molusot gyud sumala ni Kongresista Pastor “Jun” Alcover sa ANAD Partylist .

Si Alcover mibutyag sa Banat News nga bisan pa kun lupigon ang mga oposisyong magbabalaod sa kongreso sa kalig-on sa mga magbabalaod sa administrasyon, apan motabang gihapon siya sa pagpasabot sa katawhan batok sa RH Bill. Si Alcover kinsa usa na sa mga oposisyon sa maong balaodnon usa sa mga dinapit nga mamumulong karong adlawa atol sa rally nga ipahigayon sa simbahan batok sa RH Bill sa Fuente Osmeña, ning dakbayan sa Sugbo.

Mibahad si Alcover nga sa iyang pagpamulong karong adlawa iyang iyagyag nga kutob sa mga magbabalaod nga mobotar alang sa pagpasar sa RH Bill makadawat og dagko kaayong kantidad nga kuwarta isip suborno gikan sa mga tag-iya og pabrika sa mga kontraseptibo.

Matud pa niya nga gawas nga mopabaha og daghang kuwarta ang mga pabrika sa kontraseptibo, gipaluyohan pa gyud sa mga komunista ang RH Bill.

Hinuon wala niya ipasabot sa  Banat News kun unsay hinungdan nganong gipaluyohan kini sa mga komunista      apan misaad siya nga karong adlawa kini niya iyagyag atubangan sa publiko.

Hinuon nagkanayon si Alcover nga bisan unsaon sa kaparian ang pagbabag niini, kun mayoridad sa mga   kongresista molig-on niini , wala gayud silay mahimo.

Si Alcover kinsa sa sayo pa pabor sa RH Bill nagkanayon nga dihang nasuta niya nga mipabaha og minilyon ka pesos nga suborno ang mga pabrika sa kontraseptibo ngadto sa mga kongresista sa ubos balay balaoranan ug sa senado, miatras siya.

Apan labaw sa tanan dihang nasuta niya nga mga komunista usab ang nagpaluyo niini misamot siya pagsupak ning maong balaodnon. Kun mapasar ang maong balaodnon, mogahin og dakong budget ang gobiyerno para sa mga kontraseptibo nga ipanghatag nga libre ngadto sa mga magtiayon nga gustong mokontrol sa pagpanganak.

Gawas niini mohatag usab og libreng mga bitamina ang kagamhanan alang sa mga inahan nga magsabak ug sa mga isabak usab niini.

Usa sa tinguha sa RH Bill mao nga kasuportahan ang mga magtiayon nga gustong mosagop sa family planning ug ingon man kadtong mga magtiayon nga gustong manganak og daghan.  - BANAT NEWS