Namaligya porno bisan diha ang mga anak gidakop

CEBU, Philippines - Usa ka 26 -anyos nga ginang ang gisikop sa kapolisan sa Subangdaku Police Station sa dakbayan sa Mandaue human kini masakping namaligya og mga pornographic DVD’s atubangan sa iyang duha ka mga anak niadtong Miyerkules sa hapon diha sa may Hernan Cortes Street sa barangay Subangdaku.

Ang gidakop mao si Rashilda Dalimbang temporaryong nagpuyo sa maong lugar apan lumad nga taga Midsayap, North Cotabato gisikop nilang Subangdaku Police chief P/Insp.Ramil Morpos human makit-ing namaligya og malaw-ay nga DVDs samtang nagkuyog sa duha ka mga anak.

Gikatahong diha kini naninda niini 200 metros lang gikan sa police station.

“Naglagot kong nagtan-aw nga namaligya siya sa maong mga law-ay nga DVD’s atubangan sa iyang mga anak busa napugos ko sa pagdakop,” matud pang Morpos.

Apan sa linaing interbyu sa suspek siya nagkanayon nga igo ra usab siyang misakay sa oportunidad tungod kay daghan man nangita niini. Matud pa niya gi-display ra kini apan naatlan nga dunay namili ug naagian sa mga polis ug mao say pag-abot sa iyang duha ka mga anak gikan sa eskuylahan.

Matud niya ang pagpamaligya og pirated DVDs maoy iyang gibuhi sa mga anak human siya biyai sa bana lima ka tuig na ang        milabay.

Giandam na ang pagpasaka og kasong pagpamaligya sa nahisgutang pornographic materials batok sa suspek. ( /EIM)