Bata patay sa ambush

CEBU, Philippines - Patay ang 11- anyos nga dalagita ug naangol ang mga ginikanan niini human giambusan sa duha ka armadong lalaki ang multicab nga ilang gisakyan sa atubangang bahin sa usa ka tunghaan sa barangay Tutay sa lungsod sa Pinamungajan niadtong Miyerkules sa alas 5:00 sa hapon.

Ang biktima nga patay nang nadangat sa tambalanan mao si Mary Joy Eramis, 11, tinun-an sa grade five ug naangol usab ang amahan nga si Roan Eramis, 31, ug asawang si Leah Eramis, 34, pulos molupyo sa sitio Sta. Cruz sa barangay Saksak lungsod sa Pinamungajan.

Duha ka mga lalaking sakay og motorsiklo ang kalit nga namusil sa mga biktima apan usa sa gituohang kriminal nadakpan atol sa hot pursuit operation nga giilang si Perfecto Dacuma, taga barangay Esperanza lungsod sa Aloguinsan.

Matud ni SPO1 Uldarico Nengasca, Deputy Chief sa Pinamungajan Police dihang nahinabi sa Banat News gimaneho sa amahang Eramis ang multicab gikan sa barangay Saksak paingon sa lungsod.

Pag-abot sa maong lugar duha ka mga lalaking nag-atang nang daan ang kalit nga girapido ang sakyanan sa mga biktima ug pagkahuman ang gunman misakay sa motorsiklo nga nagparking diin kauban ang lookout niini ug nipasirit paingon sa lungsod sa Aloguinsan.

Si Roan naigo sa walang bahin sa kamot ug si Leah naigo sa walang bahin sa paa apan ang ilang 11- anyos nga anak naigo sa tiyan ug patay na pag-abot sa Pinamungahan District Hospital.

Duha ka kabhang sa kalibre .45 ug T-shirt ug jacket nga kolor puwa nga gituohang iya sa mga kriminal ang nakuha diha sa crime scene.

Si Dacuma, nadakpan sa balay niini sa barangay Esperanza lungsod sa Aloguinsan ug giingong positibong gitumbok ni Roan nga maoy namusil kanila apan hugtanon kining gihimakak ni Dacuma.

Gisubay na sa kapolisan ang motibo nga posibleng may kalambigitan sa ilegal nga drugas ang nahitabo ug napagan lang ang bata. ( /EIM) - BANAT NEWS