CEBU, Philippines - Human sa kapin sa tuig nga husay sa kasong pagpamaligya og cocaine, gikombikto si Russell Rosales sa korte ug napahamtangan og life imprisonment.
Si Judge Macandas Hadjirasul sa Regional Trial Court Branch 5 nakakita og igong basihan nga pahamtangan si Rosales sa maong silot ug pabayron og tunga sa milyon.
Kahinumduman nga nadakpan si Rosales sa sakop sa Regional Anti-Illegal Drugs Special Operation Task Group (RADSOTG)-7 niadtong Nobyembre 2, 2010 sa alas-12 sa udto ug nakuhaan og 1002.19 gramong cocaine nga balor og P2.1 milyones.
Ang pagkasikop kang Rosales nagumikan sa tip gikan sa Manila bahin sa kalihukan sa suspek hinungdan sa gihimong buybust operation hinungdan sa pagkasikop sa akusado.
Si Rosales kusganong mihimakak sa pasangil kaniya, apan si Judge Hadjirasul sa iyang desisyon nagkanayon nga wala siyay nakitang hinungdan aron dudahan ang testimonya sa polis. ( /EIM) - BANAT NEWS