CEBU, Philippines - Ang Metro Cebu padayon gihapong makasinati og hanging habagat ug mga pag-uwan-uwan bisan paingon nang mogawas sa Pilipinas ang bagyong Gener matud ni Ella Comahig sa PAGASA Mactan.
Si Comahig nga nahinabi sa Banat News kagahapon nagkanayon nga base sa ilang weather bulletin sa mga alas 11:00 kagahapon sa buntag si Gener hinay nga nagpaingon sa sidlakang bahin sa Taiwan.
Karong adlawa (Biyernes) si Gener gikatakda nang mogawas sa Philippine Area of Responsibility ug posibleng karong Sabado, ang Metro Cebu makasinati na og maayong panahon.
Apan sa gihapon may masinating kusog nga huros sa hanging habagat ug pag-uwan samtang kadagatan peligro pa sa mga gagmay’ng sakyanan sa dagat.
Sa laing bahin, si Rolando Punzalan Jr., Philippine Coast Guard Central Visayas Station Commander sa pakighinabi sa Banat News kagahapon mibutyag nga gikan niadtong alas 12:00 sa tungang gabii sa Miyerkules hangtud kagahapon sa alas 6:00 sa buntag gitugotan nilang makabiyahe ang tanang mga barko.
Apan nabantayan nilang kusog kaayo ang bawod nga kuyaw sa mga fastcrafts.
Matud niya nga dunay usa ka fastcraft kagahapon nga gikan sa dakbayan sa Tagbilaran, Bohol ang naglisod og abot sa pantalan sa Sugbo tungod sa kakusog sa hangin. ( /EIM) - BANAT NEWS