Illegal recruiter nadakpan

CEBU, Philippines - Usa ka gipasanginlang illegal recruiter ang gisikop sa kapolisan sa dakbayan sa Mandaue human motanyag og trabaho diha sa Mactan Export Processing Zone sa Lapu-Lapu City.

Si Gladilyn Tamayo, 42, taga barangay Tingub , kinsa migamit sa alyas nga Joy Urtiza sa dihang gisikop sa kapolisan sa Subangdaku Police Station niadtong Miyerkules sa gabii gireklamo sa tulo sa unom ka mga babayeng iyang gi-recruit.

Matud pa gipasaligan sila niining makatrabaho isip production workers sa duha ka kompanya ginganlan og KEPCO sa MEPZ apan nahibaw-an nga nangilad ra kini.

Ang mga mireklamo mao sila si Gladys Monsales, 23, Janice Monsales, 25, nga pulos taga barangay Tabok ug si Janarie Caramelo, 23, taga Paknaan kinsa gipabayad og P680 matag usa alang daw sa medical examination.

Gawas sa tulo duna pay tulo ka higala sa mga reklamante nga nailad usab apan wala pa matino kun mopasaka sila og kaso.

Ang suspek gidakop diha sa usa ka fastfood chain sa siyudad sa Sugbu niadtong Miyerkules sa laang nga gihimo sa Subangdaku Police Station pinangulohan ni Insp.Ramil Morpos.

Nabisto ang suspek nga pangilad ang gihimo niini dihang nakit-an sa mga biktima sa sulod sa bag niini ang mga dokumento nga una na nilang gisumitir ug gipahibalo sa suspek nga nahatag na ngadto sa kompanya.

Miangkon hinuon ang suspek sa salaod nga nahimo tungod sa pito niini ka mga anak nga gibuhi. ( /EIM)   - BANAT NEWS