3 ka polis pasidunggan

CEBU, Philippines - Tulo ka mga polis sa dakbayan sa Sugbo nga mitubag sa alarma sa tulis nga gilusad sa Cabardo robbery group sa usa sa mga mall sa uptown Cebu sa miaging tuig gitakdang pasidunggan sa National Headquarters sa Philippine National Police, sa Camp Crame karong umaabot nga Lunes.

Si Sr. Supt. Melvin Buenafe, hepe sa Cebu City Police Office mipahibawo niini ngadto sa mga sakop sa media ug miila sa maong mga polis nga sila si PO1 Roy Ceniza, PO1 Ernesto Silva ug PO2 Elrich Jourdin Catacutan.

Ang tulo pulos mga sakop sa Mobile Patrol Group nga maoy unang mitubag sa maong alarma sa tulis sulod sa usa ka mall duol sa Fuente Osmeña, ning dakbayan sa Sugbo.

Dugang pa ni Buenafe nga ang pasidungog nga madawat sa tulo, mao ang Most Outstanding Police Non Commission Officer (PNCO) atol unya sa ipahigayong PNP Recognition Day sa kaulohan.

Gipadayag ni Buenafe nga dako kaayo niyang garbo sa nakab-ot nga pasidungog sa tulo niya ka polis.

Gani, nanghinaot siya nga magsilbi unta kini nga inspirasyon sa ubang kapolisan kay dili hikalimtan ang unsa mang mga bayanihong buhat ang mahimo sa usa ka polis nga magtuman sa iyang katungdanan sa pagpanalipod ngadto sa publiko batok sa mga kriminal.

Samtang si Catacutan nga nahinabi sa mga tigbalita mibutyag usab nga ang ganti nga ilang madawat maoy labing makapadasig sa iyang kinabuhi sa pagtuman sa iyang katungdanan.

Sa nasayran mao kini ang ika-upat nga pasidungog nga madawat ni Catacutan human niya madawat ang Medalyang Sugatang Magiting; Medalyang Papuri, ug Medalyang Kagitingan.

Mahinumdoman nga sa pagtubag sa maong mga polis sa nahisgutang alarma sa tulis duha ka security guard sa tindahan ang nakalas, nasamdan usab si Catacutan niadtong tungora human siya mapusili sa usa sa mga tulisan. (BANAT NEWS)