CEBU, Philippines - Si Konsehal Romeo Villarante sa dakbayan sa Talisay nagkanayon nga kung ipatuman ang plano sa siyudad sa pagpasira sa satellite market sa kabarangayan apektohan pag-ayo niini ang gagmay’ng manindahay.
Si Villarante, uban nila ni Konsehal Val Ylanan ug Danny Caballero nga mga sakop sa oposisyon sa konseho sa Talisay nagkanayon nga dili kalikayan ang paghugpa unya sa kaguliyang ug kagubot sa Talisay kun matuman kining maong laraw
Ang pamahayag ni Villarante maoy iyang komentaryo sa unang pamahayag ni City Administrator Richel Bacaltos nga dili makatugot ang kagamhanan nga magpadayon sa pagpadagan sa negosyo ang mga satellite market nga walay business permit busa kinahanglang patak-opan kini.
Gani ang mga tag-iya sa lote nga gitarokan sa maong mga gagmay nga mga tindahan gipatawag na sa city hall ug gipahibawo bahin sa balaod.
Apan matud pa ni Villarante nga usa sa mga maapektohan niini kadtong mga gagmay’ng mananagat nga anha mobaligya sa ilang gagmay’ng kuha sa satellite market.
Gawas niini ang mga mamalitay maapektohan usab tungod kay imbes makadaginot sila sa plitehan, mapugos sila sa pag-adto sa bag-ong merkado sa Lagtang aron adto mangompra. (BANAT NEWS)