COMELEC balik registration

CEBU, Philippines - Gipadayon sugod kagahapong adlawa sa Commission on Elections (Comelec) ang continuing registration sa mga bag-ong botante nga kwalipikado nang makabotar sa eleksiyon sunod tuig.

Ang Comelec miingon nga kutob pa sa katapusan sa bulan sa Oktubre nila hunongon ang continuing registration.

Matud ni Arthur Patiga, election assistant sa Comelec Provincial Office dihang nahinabi sa Banat News kadto lang mga bag-ong botante nga magpangidaron na og 18-anyos sa dili pa ang eleksyon sunod tuig maoy gitugutan nga makaparehistro.

Apil sa atimanon kadtong botante nga buot mo-transfer og rehistro ingon man kadtong magpa-validate ingon man magpa-reactivate sa iyang rehistro.

Matud ni Patiga magpadayon ang continuing registration gikan sa adlaw’ng Lunes sugod alas 8:00 sa buntag hangtud alas 5:00 sa hapon hangtud sa adlaw’ng Sabado.

Apan subling suspensuhon ang registration unya sa petsa 1 sa bulan sa Oktubre hangtud sa petsa 5 atol sa filing sa certificates of candidacy (COC) sa mga mokandidato.

Si Provincial Comelec supervisor Atty. Lionel Marco Castillano una nang misuspenso sa continuing registration gikan niadtong petsa 25 sa Hunyo hangtud sa petsa 31 sa milabay’ng bulan tungod sa kamanduan sa Comelec Manila aron motabang sa voters registration didto sa Autonomous Region in Muslim Mindanao (ARMM). - BANAT NEWS