Puya gidudahang gilubong buhi

CEBU, Philippines - Usa ka puya nga gituohang buhi nga gilubong sa yuta gikawot sa nakakita niini didto sa Brgy. Basak dakbayan sa Lapulapu kagahapon sa kadlawon.

Usa kini ka babaye nga gibana-banang pito pa ka buwan nga migawas sa sabakan sa inahan nga hilom nga gilubong sa usa ka bakanteng luna likod sa usa ka dakong mall sa Barangay Basak. Sa imbestigasyon ni PO2 Luisito Ernie sa kapolisan sa Lapulapu nasayran nga si Rubin Terol, 36, minyo, nga nagpuyo sa dapit diin ilubong ang puya maoy nakamatikod nga nianang alas 7:00 sa milabay’ng gabii usa ka sakyanan ang mihunong sa maong dapit nga gisakyan sa usa ka babaye ug usa ka lalaki nanganaog sa sakyanan ug mikawot sa yuta.

Human sa pipila ka gutlo mibiya ang sakyanan, apan si Terol nga madudahon kaayo kun unsay gilubong sa maong lugar, nakahukom siya sa pagkawot niini kagahapon sa alas 6:30 sa buntag.

Sa kamabaw sa kawot dali kaayong nahabwa ni Terol ang usa ka plastic nga nakapakurat kaniya kay pagsil-ing niya sa sulod niini usa ka puya nga babaye nga wala nay kinabuhi ug gihatud dayon niya ngadto sa kapolisan.

Nagduda ang kapolisan nga buhi pa ang maong puya ug namatay kini didto na sa ilawom sa yuta ug gipangita na karon sa kapolisan ang naglubong  niini.

(/WC)(BANAT NEWS)