"Suspek" pagpusil sa fratman nadakpan

CEBU, Philippines - Unom ka dagkong pakete ug laing napulo ka gagmay nga pakete sa gituohang shabu ug duha ka kalibre .45 nga pistola ug mga bala ang nakuha gikan sa duha ka mga lalaking nasikop sa checkpoint sa kapolisan diha sa Barangay Poblacion, Sibonga Lunes sa gabii.

Si Aljun Serenio, 22, taga-Barangay Napo, Carcar City ug si Cresente Diez, 30, nga taga-Barangay Poblacion, Sibonga nasikop sa Regional Mobile Group pinanguluhan ni Insp. Ryan Orapa.

Matud pa nga si Serenio ug Diez giingong sakay sa itom nga Kawasaki nga motorsiklo paingon sa Barangay Poblacion dihang kalit mihunong pipila ka metros gikan sa checkpoint sa RMG.

Tungod niini giduol sila sa blocking team sa RMG ug nabantayan ang nagbagal nga armas diha sa ilang hawak hinungdan nga sila gisitar sa mga polis ug dihang girekisa nakuhaan sila sa maong mga gidudahang shabu.

Gisusi karon sa kapolisan kung ang duha maoy responsable sa pagpusil patay kang Cyrus Elmer Suico, 27, taga barangay Poblacion, Sibonga kinsa gipusil diha sa barangay Napo niadtong miaging adlaw.

Si Suico, miyembro sa Tau Gamma Phi fraternity, nakaangkon og daghang samad pinusilan sa lawas ug gideklarar nga patay sa Carcar Provincial Hospital. Si Suico gipusil kini sa gawas sa gi-abandona nga balay sa Barangay Napo human giingong nag-pot session sa sulod.

Si Cebu Provincial Police Office director Patrocinio Comendador mibutyag nga gitutokan sa imbestigasyon sa maong pagpamusil ang motibo may kalambigitan sa biktima sa ilegal nga drugas. (BANAT NEWS)