5 mananagat na-missing

CEBU, Philippines - Lima ka mananagat ang pabiling gipangita sa Philippine Coast Guard ug kagamhanan sa Daanbantayan human sila misungasong sa kadagatan bisan pa man og adunay bagyo.

Ang kapitan sa barangay Kinatarcan sa nahisgutang lungsod nga si Marcos Guilbuena mibutyag sa Banat News nga niadtong Lunes sa buntag pasado alas-10 nanagat luwan sa duha ka mga pumpboat nga panagatan bisan pa man sa pahibalo nga adunay bagyo.

Matud pa ni Guilbuena nga gipahibalo na lang siya sa operator nga si Gerry Taborada niadtong Lunes sa gabii nga wala pa gyud makauli ang pito ka mananagat.

Ang nagpabiling missing giila lang sa mga pangalan nga sila Benjie, Tata, Manuel, Thata ug Dodong nga luwan sa usa ka panagatan. Nakabalik hinuon kagahapon sa buntag ang mga mananagat nga sila si Ramon Beringuel ug Romil Barro nga luwan sa ikaduhang panagatan. Tungod niini daling gipahibalo ni Guilbuena ang Bantay Dagat ug ang Philippine Coast Guard kalabot sa pagkawala sa lima pa nila ka mananagat.

Matud pa ni Guilbuena nga gibutyag sa duruha nga hilabihan kakusog sa hangin ug dagko kaayo ang balod sa lawod ug napadpad sila sa Carnasa Island niadtong Lunes.

Nanghinaot si Guilbuena nanago ra sa mga isla ang lima tungod sa dautang panahon, nunot niini padayon gihapon sila sa ilang search and rescue operation pagpangita sa lima.

Si Philippine Coast Guard Commander Rolando Punzalan mibutyag sa Banat News nga mipahigayon og operasyon ang PCG apan tungod sa kadagko sa balod ilaha una kini gihunong, ipadayon ra nila kini ini og normal na sa panahon.

Na-estranded

Samtang gipahibalo sa Regional Disaster Risk Reduction Management Council nga dunay 417 ka mga pasahero sa 26 ka mga barko ang nangatanggong tungod sa padayong kadautan sa panahon.

Ang maong mga barko nagbase sa Toledo, Dumaguete, Camotes, Bantayan, Tagbilaran ug Cebu. (BANAT NEWS)