Sa kasaysayan karon - Agosto 1

Bangko sa gobiyerno

1851—Naestablisar ang unang bangko sa gobiyerno sa Pilipinas nga mao ang Banco Espanol Filipino, nga karon mao na ang naila natong Bank of the Philippine Islands.

Jeep

1941— “Hari nang Kalsada” mao kini ang bansag sa mga jeepneys sa kadalanan sa Metro Manila ug sa bisan asang bahin sa nasud isip usa ka matang sa transportasyon sa mga dili adunahan. Ang jeep unang gipaila sa US Army niadtong Agosto 1,1941 ug gihulagway kini nga usa ka gamay nga trak apan makahimo sa mahimo sa mga dagkong sakyanan sa military. Mismong si US General Dwight D. Eisenhower miingon nga dili modaog ang pwersa sa Amerika sa gubat niadtong World War II kung wala ang jeep. Ang jeep binuhat sa Willy’s Truck Company.

London Bridge

1831— Ang sikat kaayong London Bridge sa Britanya pormal nga gibuksan ning adlawa sa tuig 1831. Gisugdan kini pagbuhat niadtong 1825 ilawom sa pagdumala ni John Rennie ug nakompleto 1831. Duna kini lima ka arko ug ang materyales nga gigamit mao ang Dartmoor granite. Pormal nga mibukas niini mao sila si King William IV ug Queen Adelaide uban sa royal family. Apan gumikan sa kakaraan ug daghan nang guba ug peligro nang agian gibaligya ang taytayan niadtong 1960 sa presyo nga $2,460,000. Ang nakapalit nga si Robert McCulloch mipa-dismantle niini ug gidala kini sa Havasu City, Arizona sa US diin gipabarog kini og balik ug natapos niadtong Oktubre 10, 1971.

Boxer Rebellion

1900— Miulbo ang giyera sibil sa China nga popular nga gitawag nga “Boxer Rebellion.” Ang mga Intsik pinangulohan sa grupong Righteous Harmony Society nag-alsa batok sa mga langyaw’ng namuyo ug namuhonan sa ilang nasud nga gihulagway nilang usa ka matang sa imperyalismo. Lakip sa ilang gireklamo mao ang pagkatap sa kristiyanismo, pagmanipula sa ekonomiya, dili patas nga mga kasabutan ug ang pagkawala sa gahom sa ilang gobiyerno kay mas molabaw ang patakaran sa mga langyaw.