Japan motabang pag-ugmad sa Sugbo

CEBU, Philippines - Usa ka joint survey mission ang ipahigayon sa 39 ka mga kompaniya sa siyudad sa Yokohama, Japan dinhi sa lalawigan sa Sugbo alang sa urban development system  o pamaagi sa pag-ugmad sa mga sentro nga lugar ning probinsya.

Ang maong kaugmaran nahimo human sa sagunson nga panagtagbo sa mga opisyal sa Research Program and Organizational Development (RPAD) ubos sa Metro Cebu Development and Coordinating Board (MCDCB) ug sa Japan International Cooperation Agency (JICA).

Ang maong pagtuon dili lamang ipunting sa kinapusorang lugar sa dakbayan sa Sugbo kundi lakip na sa ubang mga lugar ning lalawigan sama sa dakbayan sa Danao; mga lungsod sa Compostela; Liloan; Consolacion; dakbayan sa Mandaue; lungsod sa Cordova; mga syudad sa Lapu-Lapu; syudad sa Talisay; Minglanilla; syudad sa Naga; San Fernando ug dakbayan sa Carcar.

Tukion sa maong pagtuon ang mga hagit sa suliran kalabot sa basura, drainage system, trapiko ug uban pa.

Sumala ni Norihiko Nomura, usa ka dakong opisyal sa kagamhanan   sa Yokohama City nga ilang ialagad   sa kagamhanan ning lalawigan ang kasayoran nga ilang nasinatian sa pagpalambo sa mga sentrong urban didto sa Japan.

 Sa iyang pakighinabi kanila ni Provincial Administrator Eduardo Habin ug ni Engr. Adolfo Quiroga ang pangulo sa Provincial Engineering Office ug Provincial Planning and Development Office   si Nomura nagkanayon nga gusto nilang ang mga sentrong urban sa lalawigan sa Sugbo makabaton og kalamboan nga sama sa nakab-ot sa mga sentrong urban sa Japan.

Midugang siya nga human nila ikaplastar ang tanang kaugmaran nga ilang isugyot sa matag dakbayan ug lungsod nga ilang gibisitahan, ila kining ibalik nganhi sa kagamhanan sa lalawigan aron paabuton   kun mobubo ba og budget ang kagamhanan alang sa mga kaugmaran nga ibutang sa mga nagkadaiyang lugar sa lalawigan sa Sugbo. (BANAT NEWS)