Gipatay tungod sa usa ka bulig nga saging

CEBU, Philippines - Patay ang usa ka 36- anyos nga caretaker ug hapit pa mahabwa ang ginhawaan niini dihang giduslak og sundang sa iyang silingan tungod lang sa ilang away sa usa ka bulig nga saging diha sa Siarot Compound sa Sitio Pajo, barangay Pitalo lungsod sa San Fernando niadtong Domingo sa alas 6:00 sa gabii.

Ang biktima mao si Joseph Siarot, 36, caretaker sa tag-iya sa luna sa Siarot Compound samtang ang suspek mao ang laing caretaker nga si Paquito Satorre, 62, nga silingan ra sa biktima. Matud ni PO2 Jose Claire Palagtiosa sa San Fernando Police Station dihang nahinabi sa Banat News nasuko ang suspek ngadto sa biktima dihang gikuha sa biktima ang usa ka bulig nga saging nga iyang giangkon siyay nagtanom.

Ang biktima ug iyang otso anyos nga anak nga lalaki pauli na unta sa ilaha dihang kalit nga mibutho ang suspek sa ilang agianan ug mikomprontase sa biktima kabahin sa maong saging hinungdan sa ilang panaglalis.

Dihadiha miibot ang suspek sa gitakin nga sundang dayon gikalitan og duslak ang tiyan ug giusban og tigbas ang tuong abaga sa biktima samtang ang bata wala na hilabti.

Ang biktima daling gidala sa South General Hospital sa Naga City apan pagka alas 9:10 sa gabii gideklarar kining patay.

Samtang ang suspek nagdaling nisibat pahilayo ug nisakay og bus pasaheroan nagbitbit pa sa sundang apan nababagan sa kapolisan ang bus pag-abot sa Naga City hinungdan sa pagkasikop niini. (BANAT NEWS)