CEBU, Philippines - Kapin sa 60 ka panimalay ang nasudlan og tubig sa dagat tungod sa dagkong balod nga mihapak sa ilang mga barangay diha sa syudad sa Talisay, giingong hinungaw kini sa bagyong Gener nga atoa sa Luzon.
Si Talisay City administrator Richel Bacaltos nga nahitabi sa Banat News mibutyag nga naapektuhan nga barangay mao ang barangay Poblacion, Dumlog, Tangke, San Roque, Cansojong, Biasong ug Pooc.
Kagahapon nagtigom ang mga barangay kapitan sa apektadong mga dapit aron masulbad ang problema. Ang Poblacion maoy gikatahong nagrabehan samtang sa Biasong, naguba ang kongkretong rip-rap nga gituyo unta aron panalipod sa balod.
Aduna nay gipang-apod nga relief goods sa mga naapektahan ilabi na sa mga gikonsiderar nga ‘heavily affected areas’ nga dunay daghang mga balay nga nangaguba tungod sa balod. Sagad sa mga balay nga naguba mao kadtong mga ginama sa gaay, samtang miawas usab ang pipila ka mga fishpond ug naabot sa kabalayan ang mga isda nga gihimong sud-an sa mga residente. (BANAT NEWS)