Sa kasaysayan karon

Spanish Civil Code

CEBU, Philippines - 1889—Gipatuman dinhi sa Pilipinas ang Spanish Civil Code pinasikad sa usa ka Royal Decree ug kamandoan sa gingharian sa Espanya. Tungod kay kolonya sa Espanya ang Pilipinas giisip sa mga Espanyol nga makatarunganong maprotehian ang mga namuyo nga Espanyol ug mga Filipino sa maong balaod gikan sa pagpangabuso.

Kevlar fiber

1923— Daghan ang nagtuong ang popular ug gamit kaayo karong ‘bullet proof vest’, bullet-proof helmets ug uban pang gamit sa kasundaluhan aron panagang sa bala naimbento sa mga kalalakin-an. Apan ang pagkatinuod ang nakaimbento sa Kevlar nga maoy sangkap paghimo niini usa ka babaye nga si Stephanie Kwolek kinsa gipanganak Hulyo 31, 1923. Si Kwolek nga usa ka Amerkanong chemist nagtrabaho sa usa ka textile fiber company ug nakadiskubre sa usa ka high-performance fiber nga makasugakod og asido, base-resistant ug makasugakod og high temperatures. Sa pipila ka oras niyang pagsagolsagol sa mga kemikal usa ka liquid polymer ang naimbento niini nga kung i-lala lima ka pilo ang gilig-unon niini itandi sa puthaw apan katunga lang ang gibug-aton. Ang Kevlar gigamit na karon sa bullet-proof vests, aircraft parts, inflatable boats, gloves, rope, ug building materials.

Unpowered flight

2003—Si Felix Baumgartner nga usa ka Austrian mao ang unang tawo nga nakalabang sa English Channel pinaagi sa unpowered flight o ang pag-uyon-uyon sa hangin suot ang usa ka glider suit. Milayat siya gikan sa usa ka eroplano sa gitas-ong 9,800-metros (30,000-ft) sa ibabaw sa Dover, England ug mi-glide og 36-kilometros (22-milya) tabok sa English Channel sulod lang sa napulo ka minutos. Aron dili maapektahan sa sub-zero temperature sa ibabaw nagsuot og usa ka special flight suit nga dunay pako nga ginama og carbon-fiber sa iyang likod. Ang iyang pag-glide nagsugod sa gikusgong 220 mph, ug mihinay kutob sa 135 mph sa wala pa siya motugpa nga nag- parachute sa Cap Blanc-Nez, duol Calais, sa France. (BANAT NEWS)