Gungob subling modagan sa Cordova

CEBU, Philippines - Sa ikaunom nga distrito sa lalawigan sa Sugbo maoy bugtong namatikdan nga kisaw na kaayo ang kalihokan ni kanhi mayor Avelino Gungob nga maoy mahimong kaatbang alang sa 2013 lokal eleksiyon batok sa naglingkod sa katungdanan nga si Mayor Teresa Alegado.

Sukwahi kini sa dakbayan sa Mandaue nga wala’y mga politiko nga namatikdang makigsangka kang Mayor Jonas Cortes kay mingaw ug wala pa man gyud mopakita og mga kalihokang politikanhon niining mga panahona.

Sa lungsod sa Cordova, adunay gihuhongihong nga ang promoter sa boxing nga si Wakee Salud maoy nagtinguha sa pagsakbang kang Mayor Adelino Sitoy apan wala pa usab mopasiugda og politikanhong kalihokan sa pagpakita og mga timailhan nga mahinayon ang gitinguha niining pag-atbang.

Si Gungob sa lungsod sa Consolacion daw dili na kapugngan ang iyang pagsakbang kang Mayor Alegado kay naghimo na man kini og mga kalihokan sa kabarangayan pinaagi sa paghimo’g pulongpulong sa mga molupyo.

Kini ang nasayran sa Banat News kang Konsehal Illuminido Alin nga giisip nga oposisyon sa administrasyon ni Alegado nga maoy kauban sa grupo ni Gungob sa matag gabiing pulong-pulong nga ilang gihimo sa kabarangayan.

Gitataw ni Alin nga hugot na ang hukom ni k Gungob nga mokandidato sa pagkamayor sa maong lungsod karong 2013 eleksiyon. Matud pa niya nga kompleto ang lineup ni Gungob gikan sa bise mayor ug hangtod na ngadto sa mga konsehal nga maoy makaatbang sa mga konsehal nga line up ni Alegado.

Sa dakbayan sa Mandaue maoy hinglantawan nga walay kontra si Mayor Cortes sa iyang pagpasubli sa ikatulong termino sa pagka mayor sa dakbayan sa Mandaue nunot usab sa natigayon nga paghiusa sa mga politiko. (BANAT NEWS)