Gacasan mipasalig di magdumot sa mibotar og "Yes"

CEBU, Philippines - Gipasalig ni Kapitan Michael Gacasan sa mga molupyo sa Banawa ug Englis nga padayonon gihapon niini ang pagbubo og mga proyekto sa maong dapit ug dili siya magdumot sa mga tawo nga mibotar og “Yes” atol sa plesbisito niadtong Sabado.

Ang “No vote” maoy midaug sa plebisito ug gipadayag ni Gacasan nga nasuta na gyud niya ang tingog sa katawhan nga supak gyud sila sa pagbuak sa Guadalupe.

Gisaysay ni Gacasan dinhi sa Banat News nga dili kalikayan nga aduna usahay higayon nga malangan ang pagkuha sa basura sa mga sitio sa Guadalupe sanglit unom lang ka garbage truck ang nag-andar kay ang tulo nangaguba na.

Nasayran nga mokabat sa 84 ka sitio ang Guadalupe ug gipasalig sa kapitan nga himoon niyang patas ang pagtrato niining mga sitioha.

Midugang ang kapitan nga taud-taod na siya nga ngangayo og dugang garbage truck sa kagamhanan sa siyudad sa Sugbo apan wala gihapon kini maabot.

Matud pa sa kapitan nga iyang girespetohan ang mga tawo nga mibotar og “Yes” ug iya kining giawhag nga mokooperar lang kaniya.

Malinawon ang maong plebisito niadtong Sabado diin sa 28,421 ka rehistradong botante sa Guadalupe, mikabat   lang sa 12,097 o 42.5 % ang mibotar.

Mikabat sa 8,107 ang mibotar og “No”, samtang 3,990 ang mibotar og “Yes” sa pagbuak sa nahisgutang barangay.

Samtang si Crispin Villarin, presidente sa United Banawa Englis Association Inc.(UBEAI) human modawat sa ilang kapildihan miawhag kang Gacasan nga ipabawi niini ang 13 ka sitio nga nahisakop sa barangay Labangon.

Lakip nga ipabawi mao ang Rosalina Village nga maoy gipuy-an sa kapitan sa Labangon. (BANAT NEWS)