Wa mag-helmet 1 patay, 2 angol

CEBU, Philippines - Tulo ka motorista kinsa pulos walay helmet nagkabinanggaay, namatay ang usa samtang duha ang naangol didto sa sitio Tangasan, barangay Valladolid dakbayan sa Carcar sa miaging Sabado sa gabii.

Ang namatay nailhan nga si Jarlemly Gantuangco Watin, 23, molupyo sa Bantayan Tuyom, samtang ang mga angol mao si Christian Regis delos Nieves, 22, nga angkas ni Gantuangco, ug si Godofredo Cabaluna, hingkod, nga maoy nagsakay  sa motorsiklo nga gikasugat sa motor nga gimaneho sa namatay.

Sa pakighinabi sa Banat News ni PO1 Gennis Lamosao sa Carcar City Police Station, nasayran nga ang mga biktima nagsakay sa ilang mga motor nga pulos walay helmet.

Si Watin ug si Delos Nieves paatubang sa barangay Valladolid samtang si Cabaluna nagpaingon usab sa dapit nga gigikanan nila ni Watin. 

Dihang pag-abot nila sa maong lugar   gikatahong si Cabaluna misuway pag -overtake og laing sakyanan ug sa paningkamot niyang makauna sa iyang gisunod, mikawat siya sa pikas lugar sa karsada nga maoy gisubay   niadtong tungora ang nagbaguros nga motorsiklo ni Watin.

Ang duha nga pulos na wala makakontrolar sa dagan sa ilang mga sakyanan, nagkabangga busa pulos misaliring ang ilang mga motor ug nanglupad silang tulo.

Si Watin kansang ulo nga walay helmet maayong pagkabundak sa sementadong karsada sa pagtugpa niini dihadiha nakabsan sa kinabuhi.

Samtang sila si delos Nieves ug si Cabaluna wala kaayo maintimano bisan walay helmet apan pulos anaa sa talandugon nga kahimtang.

Anaa silang duha karon sa Vicente Sotto Memorial Medical Center sa dakbayan sa Sugbo diin sila dad-a human sa maong hitabo.

Ang maong disgrasya maoy usa sa gipangandaman sa helmet law   kansang higpit nga pagpatuman giuswag ngadto sa Enero sa sunod tuig. Kini human sa daghan kaayong reklamo sa mga motorista kalabot sa estrikto nga pagpatuman sa kagamhanan niini.

Alang sa taga DTI, mituman lang sila sa sugyot sa balaod nga kinahanglan nga ang helmet nga ipagamit sa mga motorista mao kadtong mga dekalidad ug lig-on   ug gibaligya sa mga supplier nga akreditado sa DTI.

Apan mireklamo niini ang mga motorista tungod kay ang ilang napalit nga helmet sa wala pa estriktoha ang pagpatuman sa helmet law, gikan sa mga tindahan nga dili akreditado sa DTI busa dili kwalipikadong kapapitlan og ICC sticker sa DTI. Kadaghanan usab sa mga motorista gustong dili gyud magsul-ob og helmet apan dili gusto ang kagamhanan nga dali rang mangamatay ang mga motorista busa nanlimbasug kini nga ikapatuman ang helmet law. (BANAT NEWS)