Guadalupe pabiling tibuok

CEBU, Philippines - Magpabilin ang Barangay Guadalupe nga labing dakong barangay sa dakbayan sa Sugbo human mayoriya sa mga residente ang mibotar pagsupak nga ibuwag ang sitio Banawa ug Englis aron mamahimong ika-81 nga barangay sa siyudad.

“Timailhan kini nga ang Birhen sa Guadalupe dili mosugot nga mobuwag ang Banawa ug Englis sa iyang sabakan. Moyukbo ako sa desisyon sa katawhan,” matud pa sa text message ni kanhi kongresista Antonio Cuenco sa The Freeman. Si Cuenco maoy nangamahan sa balaudnong pagbuwag sa Banawa-Englis.

Si Cebu City South District Rep. Tomas R. Osmeña, kinsa wala mobotar kagahapon nagkanayon nga kini timailhang walay impluwensya sila si Cuenco ug Mayor Michael Rama sa mga Guadalupe.

“Maybe their endorsement even backfired. Both Cuenco and Rama should have let the people alone to decide. Now they proved that they cannot knead the people. They should read the handwriting on the wall,” matud pang Osmeña.

Atol ning pagsulat sa balita alas-8 pasado sa gabii kagabii, sa unofficial result diha sa City Hall, ang No nakakuha og 4,268 nga botos samtang 1,880 lang sa Yes. Hinuon kini gikan pa lang sa 42 ka clustered precincts gikan sa 79.

Ang Guadalupe adunay gibanabanang 28,000 ka botante apan ang turn-out o namotar kagahapon gibanabanang 10 mil ngadto sa 12 mil lang.  (BANAT NEWS)

Show comments