Sa kasaysayan karon

Airmail

CEBU, Philippines - 1920— Nakahinumdom pa ba kita aning gitawag kaniadtong “Airmail?” Popular kini kaayo kaniadtong wala pa mauso ang mga cellphones nga mahimo makatawag ug maka-text ingon man sa internet aron ang tawo bisan unsa kalayo sa lugar mahimong maka-chat . Ang unang matawag nga transcontinental airmail flight nahitabo niadtong Hulyo 29, 1920. Ang abyon nga nagdala sa usa lang ka suwat naggikan sa New York ngadto na sa San Francisco nga gipiloto ni Jack Knight. Ang unang interstate airmail gipadala gikan sa Garden City ngadto sa Mineola,NY sa pilotong si Earle H. Ovington, nga gikunsiderar nga unang U. S. mail pilot (1911). Nasuta usab nga mao kini ang usa sa labing kuyaw nga trabaho tungod kay sa 40 ka mga unang piloto nga gikuha aron modala sa mga airmail, 31 kanila ang nangamatay tungod sa crash.

Space Race

1958— Pormal nga gilagdaan ni kanhi US President Dwight Eisenhower ang balaod alang sa katukoran sa National Aeronautics Space Administration (NASA) aron makaapas sa gihulagway kaniadtong “technological gap” nga nahimo sa kaniadto Union Soviet of Socialist Republic of Russia (USSR) bunga sa malampusong pagpalupad sa mga Ruso niadtong Oktubre 1957 sa labing unang satellite ngadto sa kawanangan nga mao ang Sputnik. Tungod sa grabeng ‘public opinion’ nga nag-ingong nabiyaan na ang US sa teknolohiya sa USSR gipirmahan ni Eisenhower ang National Advisory Committee for Aeronautics (NACA) nga nahimo na karong NASA. Unang nakapalupad og malampusong satellite ang NASA niadtong Enero 1958. Niadtong 1961, gimando ni US President John F. Kennedy nga kinahanglang ang US maoy unang makapadala og tawo ngadto sa buwan, kini natinuod niadtong Hulyo 20,1969 sa Apollo 11 Mission. Ang US maoy midaog sa space race. (BANAT NEWS)