Lending office gikawata'g P103 mil

CEBU, Philippines - Mikabat sa P103,000 ang salapi ug nagkalainlaing mga butang ang nasakiyo sa wala hiilhing kawatan gikan sa usa ka lending firm sa dalan Plaridel sa barangay Umapad, dakbayan sa Mandaue sa miaging gabii.

Si PO1 Nino Gortero sa Presinto 5 sa Mandaue City Police Office mibutyag sa Banat News  nga gipanid-an pa nila karon ang   milungkab sa Jee Lending Corporation nga gipanag-iya ni Cleofe Quimbot Morales nga taga barangay Cogon sa lungsod sa Compostela.

Matud pa ni PO1 Gortero nga si Chezel Melecio, hingkod, ug stay-in cashier sa maong lending firm maoy unang nakadiskobre sa maong pagpanglungkab sa iyang pagbangon sa alas 5:00 pasado ang takna sa miaging buntag

Kini sa dihang pagsulod niya sa   opisina abli na ang hunos ug guba na usab ang   puthaw nga rehas nga giali sa bintana.

Sa pagsil-ing niya sa kaha, didto nadiskobrehan niya nga nawala na    ang P103,0000 cash sulod niini uban sa laptop nga nagkantidad og P40,000 ug video camera nga P30,000

Matud pa ni PO1 Gortero nga ang Scene on Crime Operation (SOCO) naghimo na usab og pakisusi sa maong hitabo pinaagi sa pagkuha og mga finger print sa mga dapit nga ilang gituhoang nahikapan sa mga kamot sa mga kiriwan. (BANAT NEWS)