Papa, anak giambush

CEBU, Philippines - Patay ang usa ka amahan ug kritikal usab ang kahimtang sa anak niining babaye human silang duha gibanhigan sa nagbinugtong nga armadong lalaki sa sitio Langlang, barangay Cogon-Cruz sa dakbayan sa Danao alas 5:40 sa buntag sa miaging adlaw.

Ang namatay mao si Concordio Arenas, 54, samtang kritikal ang kahimtang sa anak niining si Niña Mae Arenas,19, diha sa Vicente Sotto Memorial Medical Center sa dakbayan sa Sugbo.

Si SPO2 Ildefonso Prosia sa kapolisan sa maong dakbayan nga nahinabi sa Banat News miingon nga padulong unta maghatud si Arenas sa anak sa trabahoan niini diha sa usa ka pabrika sa Danao luwan sa motorsiklo.

Apan paghidangat sa maong dapit kalit lang mitumaw ang wala hiilhing lalaki nga mibabag sa ilang agianan ug kalit nga mipaulan kanila og bala, ang amahang Arenas naigo sa dughan , ulo ug ubang bahin sa lawas hinungdan sa ilang pagkatumba sa dalan.

Sumala pang Prosia, dead on the spot ang amahang Arenas samtang samad pinusilan sa tuong bukton ug grabeng bun-og sa kalawasan ang naangkon sa anak niining dalaga.

Ang duha daling gidala sa Danao Provincial Hospital apan ang anak nga maoy buhi gibalhin sa Vicente Sotto Memorial Medical Center sa dakbayan sa Sugbo alang sa dugang pag-atiman.

Anggulo may kalambigitan sa panag-ilog sa yuta ang gitutukan karong motibo sa maong krimen sanglit nasuta nila sa ilang police blotter nga midangop kini kanila niadtong miaging buwan tungod sa kabalaka sa iyang kinabuhi human silay gipaboran sa korte kabahin sa kaso sa yuta.(/EIM) (BANAT NEWS)