CEBU, Philippines - Patay ang usa ka lalaki nga gidudahang bugaw human gipusil sa duha ka lalaki nga nagmotor pasado alas-2 sa kaadlawon kagahapon diha sa dalan Sanciangko sa barangay Kamagayan sa dakbayan sa Sugbo.
Ang biktima nailhan nga si Johnrey Bacolod, molupyo sa maong lugar kinsa gipaulanan og bala sa duha ka wala mailhing mga lalaki samtang ang biktima nakigtabi sa usa ka babaye diha sa daplin sa dalan.
Ang mga mamumuno luwan sa usa ka motorsiklo kalit nga mibutho ug ang backrider nanaog ug miduol sa biktima dayong pusil niini duha ka higayon ug pagkahuman nangikyas padulong sa direksyon sa Osmeña Blvd. ning dakbayan.
Ang biktima daling gidala sa Cebu City Medical Center apan nakabsan gyud kini sa iyang kinabuhi.
Wala pa matino sa kapolisan kung unsay motibo sa pagpatay sa biktima apan gidudahang may kalambigitan kini sa trabaho niining pagpamugaw. (BANAT NEWS)