Evacuation Drill sa Talisay malampuson

CEBU, Philippines - Malampuson sa kinatibuk-an ang duha ka oras nga pagpahigayon og evacuation drill sa sitio Isla Verde ug Ilang-Ilang sa barangay San Isidro, dakbayan sa Talisay kabahin sa pagpangandam kung dunay katalagman.

Apan pipila ka mga residente ang dunay kaugalingong komento sa pamaagi sa evacuation tungod kay nakita nila ang kakulangon sa mga rescuers sa mga ekipo sama na lang sa mga hagdanan nga sak-an sa mga tiguwang, bata ug kababayen-ang i-evacuate diha sa mga dagkong trak.

Matud pa nila kung sa tinud-anay unya nga sitwasyon nga kusog ang bunok sa ulan, dangog, basa ug uban pa, lisod kaayo alang sa mga gagmay’ng bata, mga tiguwang ug mga kababayen-an nga makasaka sa mga trak kung walay hagdan.

Hinuon ang mga residente nasaksihan sa mga tigbalita nga preparado sila sa ilang buhaton sa higayon nga dunay flashflood.

Si Kapitan Marieta “Yeyen”Bucao, asawa ni Bise Mayor Alan Bucao mibutyag nga ang maong duha ka sitio naa duol sa sapa sa Mananga diin gipaubos nila kini sa priority 1 ug 2 sanglit duna na kini mga insidenteng gilunopan sa tubig.

Ang priority 1 dunay 96 ka mga pamilya ug gilangkuban sa 377 ka mga miyembro sa pamilya pulos nagpuyo sa kilid gyud sa sapa samtang ang Priority 2 duna kini 106 ka mga pamilya ug gilangkuban sa 427 ka mga miyembro sa pamilya nahimutang sa ibabaw apan duol gihapon sa sapa.

Ang mga nabiktima kunohay sa baha gipabakwit ngadto sa San Isidro Elementary School diin ang maong tunghaan maoy gihimong evacuation center samtang gidala usab sa mock emergency field clinic nga dunay medical personnel ang mga ‘nangaangol’ ug ang medyo grabe sa Talisay City District Hospital.

Sa laing bahin, si FO3 Guiller Pegarido, hepe sa Emergency Medical and Rescue Services Section sa Talisay City Fire Station mibutyag nga ang kalihukan kagahapon lakip sa proactive program sa city disaster and risk management council sa siyudad nga himuon matag tulo ka buwan.

Sunod nga giplano mao ang landslide evacuation drill ngadto sa mga bukirang barangay sa Talisay, fire ug earthquake evacuation drills diha sa mga publiko ug pribadong tunghaan sa Talisay.

Kagahapon si Director Minda Morante sa Office of Civil Defense ug chairman sa Regional Disaster Risk Reduction Management Council ang mitambong sa kalihukan.

Si Woodrow Denuyo, Superintendent sa Department of Education (DepEd) sa Talisay City Division mikanselar sa klase sa San Isidro Elementary School kagahapon tungod sa maong drill kay gihimong evacuation center ang ilang tunghaan. (BANAT NEWS)