Young gitaktak sa Vice Mayors' League kay absenero

CEBU, Philippines - Hingpit nang gitaktak si Vice Mayor Joy Augustus Young gikan sa listahan   sa Vice Mayors’ League of the Philippines (VMLP)-Cebu Chapter gumikan sa pagka-absenero niini sa ilang mga miting.

Sumala pa sa VMLP-Cebu Chapter president nga si Toledo City Vice Mayor Dydee Zambo nga ang pagkaway tunga-tunga ni Young sa ilang mga tigom nagtimaan nga dili kini interesado sa pagpabilin pa ilang liga.

Dugang usab ni Zambo nga way mapuslan ang liga kang Young kay wala usab kini bayad-bayad    sa iyang binuwan nga membership due. Gidayeg ni Zambo ang gisundan ni Young nga si Mayor Michael Rama kinsa maoy bise mayor sa siyudad sa panahon sa kanhi mayor ug karon Kongresista Tomas Osmeña.

Nagkanayon si Zambo nga aktibo kaayo si Rama sa ilang mga kalihukan kaniadto.

Apan si Young sa iyang bahin, misaysay nga gawas nga busy siya sa trabaho, dili siya ganahan motambong sa tigom sa mga bise mayor nga taga Sugbo kay alang kaniya mas ganahan siya makig-uban sa mga bise mayor sa national chapter. (BANAT NEWS)